Казанның 25 автобусы СитиСофт системасын кертте – ул юлларны, урамнарны яктыртуны һәм җыештыруны күзәтә

Бу хакта Евгения Лодвигова Астанадагы форумда хәбәр итте

Фото: Денис Гордийко

(Казан шәһәре KZN.RU, 6 нчы июль). Казанда СитиСофт системасы 25 шәһәр автобусында эшли, аларның маршруты 600 км юлны каплый. Реаль вакыт режимында ясалма интеллект урамнарны кардан чистарту сыйфатын, эшләми торган яктырткычларны, юлларның, билгеләрнең һәм тамгаларның торышын билгели. Бу хакта Татарстан Республикасы башкаласы вице-мэры Евгения Лодвигова «Астананың 25 еллыгы. Яңа перспективалар. Яңа мөмкинлекләр» тугандаш шәһәрләр мэрлары форумында хәбәр итте. Чараны ачуда кунакларны Казахстан Президенты Касым-Жомарт Токаев һәм Астана акиме Женис Касымбек сәламләде.

Форумда катнашучылар шәһәрләрнең үсеше һәм аларның глобаль дөньяда үсеш һәм инновацияләрнең төп үзәкләре буларак роле турында фикер алыштылар. Форумда сигез панель сессия эшләде, шуларның берсендә («Шәһәрләрнең цифрлы трансформациясе: инновацион проектлар, программалар һәм технологияләр») Евгения Лодвигова чыгыш ясады. Сессияләрдә дөнья бизнесы лидерлары, финанс институтлары һәм халыкара оешма вәкилләре, дәүләт һәм фән эшлеклеләре, АКШ, Бөекбритания, Германия, Италия һәм башка илләрдән журналистлар катнашты.

Сәламләү сүзендә Казан вице-мэры билгеләп үткәнчә, мондый чаралар халыкара хезмәттәшлекне ныгытырга һәм акыллы шәһәрләр үсешендә алдынгы практикалар белән уртаклашырга ярдәм итә. Евгения Лодвигова муниципалитетның цифрлы трансформация өлкәсендәге казанышлары һәм планнары турында сөйләде. Аерым алганда, ул өч юнәлеш буенча проектлар тәкъдим итте: гражданнар белән хезмәттәшлек итү, төзекләндерүне контрольдә тоту һәм зур мәгълүматлар белән эшләү.

Спикер сүзләренә караганда, Казанда Бердәм муниципаль контакт-үзәк - мәгълүмат чыганакларын берләштерә алырлык система төзиләр, хезмәткәрләргә хәбәрләр җыю һәм төгәл контроль өчен уңайлы инструмент бирәчәк. Шулай ук контакт-үзәк Телеграм-бот ярдәмендә башкаручы белән аралашырга, проблеманы хәл итү статусы турында белергә мөмкинлек бирәчәк. Система биремнәрне кабатлауны булдырмаска, кире элемтәгә вакытны кыскартырга һәм тиз арада статистика җыярга ярдәм итә. «Без хезмәткәрләрсез гаризаларны кабул итәргә һәм маршрутлаштырырга, охшаш гаризаларны гомумиләштерергә һәм автомат рәвештә җавап бирергә ярдәм итә торган ясалма интеллект системасын тулыландырачакбыз», – дип аңлатты ТР башкаласы вице-мэры.

Икенче юнәлеш буенча – шәһәр төзекләндерү һәм шәһәр территориясен контрольдә тоту – Казанда СитиСофт системасын керттеләр. Хәзер белгечләр өстәмә рәвештә ясалма интеллектны тукталышларның торышын, юлларның законсыз ябылуын һәм җир эшләрен билгеләргә, шулай ук язуларны һәм граффитиларны ачыкларга өйрәтәләр. Евгения Лодвигова билгеләп үткәнчә, барлык мәгълүмат бердәм шәһәр дашбордында күрсәтелә, ул цифрлаштыруның өченче юнәлешен билгели – зур мәгълүматлар белән эшләү һәм барлык шәһәр мәгълүмат системаларын интеграцияләү.

Бүгенге көндә Казанда 20 дән артык мәгълүмат системасы эшли, аларда көн саен дистәләгән мең операцияләр башкарыла һәм меңләгән документлар әзерләнә. Моннан тыш, шәһәрне күзәтеп тору өчен күп кенә зур мәгълүмат чыганаклары бар. Бу мәгълүматны гомумиләштерү һәм цифрлы мәгълүматлар нигезендә Казан белән идарә итүгә күчү – шәһәрнең цифрлы дубликаты ярдәмендә хәл итәргә планлаштырылган зур бурыч. Бу реаль вакытта һәм шәһәр хуҗалыгының барлык юнәлешләре буенча мәгълүмат алучы зур математик модель булыр дип планлаштырыла, дип йомгаклады Казан вице-мэры.

Шулай ук укыгыз

Барлык яңалыклар