169 сайлау участогында казанлылар сатып алу бәяләреннән продуктлар сатып ала алачак

Сәүдә 19-нчы сентябрь көнне оештырылачак, барлыгы 250 тонна продукция кертү планлаштырыла.

Фото: Марат Мугинов

(Казан шәһәре KZN.RU, 14-нче сентябрь, Ксения Швецова). 19-нчы сентябрьдә, Россия Федерациясе Дәүләт Думасы депутатларын сайлауның соңгы тавыш бирү көнендә, Казанда 169 сайлау участогында ярминкәләр оештырылачак. Шәһәрлеләр аларда сатып алу бәяләре буенча азык-төлек һәм көнкүреш товарлары сатып ала алачак.

Ярминкәләр шәһәр мәктәпләрендә ачылган участокларда оештырылачак, дип хәбәр итте бүген «Татар-информ» мәгълүмат агентлыгында узган матбугат конференциясендә Азык-төлек һәм социаль туклану департаменты генераль директоры Рима Мөхәммәтшина. Ярминкәләрдә карабодай, токмач, дөге, шикәр, чәй, көнбагыш мае, куертылган сөт тәкъдим ителәчәк. Шәһәрлеләр шулай ук җирле көнкүреш химиясе җитештерүчесенең продукциясен дә сатып ала алачак.

«Моннан тыш, 20 объектта үзмәшгульләр катнашында ярминкәләр оештырылачак, – дип өстәде Р.Мөхәммәтшин. – Без барлыгы 250 тонна продукция кертергә планлаштырабыз».

Исегезгә төшерәбез, киләсе сайлауларда 920 меңнән артык казанлы тавыш бирә алачак, шуларның 10,8 меңе беренче тапкыр тавыш бирәчәк. Барлыгы шәһәр территориясендә 463 сайлау участогы оештырылган. Казан халкына Россия Федерациясе Дәүләт Думасы депутатларын, Татарстан Республикасы Дәүләт Советының 15-нче номерлы Азино бермандатлы сайлау округы һәм Казанның 4-нче номерлы Академик шәһәр Думасы һәм 20-нче Липатов сайлау округлары депутатларын сайларга туры киләчәк.

Шулай ук укыгыз

Барлык яңалыклар