«Без бармый кала алмадык»: Казанның ветеринария табиблары Донбасста хайваннарны коткару миссиясен үтәп кайткан

Ике атна эчендә Казан волонтерлары фронт яны территорияләрендә 70 тән артык хайванны стерильләштергән

Казанның «Көчекләр патруле» приюты волонтерлары Донецк һәм Луганск Халык Республикалары территориясендәге этләргә, песиләргә ветеринария ярдәме күрсәтеп, махсус хәрби операция зонасында икенче гуманитар миссияне тәмамлады. Иреклеләр «Вилль вет» ветеринария клиникасы белән бергә караучысыз калган хайваннарга ярты тонна азык алып килгән, белгечләр атна дәвамында фронт яны территорияләрендә 70 тән артык хайванны бушлай стерильләштергән.

«Көчекләр патруле» приюты фотосы

Казанның бер төркем волонтерлары Донецкның «Кошкин дом» приюты үтенече буенча юлга кузгала. Иреклеләр Кировск (ЛХР) һәм Елизаветовск шәһәрләрендә эшләгәннәр. Соңгысы халык тарафыннан тулысынча диярлек ташланган шәһәр булып чыккан. Биредә ташландык этләрне өлкән яшьтәге бер ханым караган. «Көчекләр патруле» җитәкчесе Светлана Ким һәм «Вилль Вет» клиникасының ветеринария табиблары караучысыз калган хайваннарга кирәкле медицина ярдәме күрсәткән.

Кировскта операцияләр һәм стерильләштерү чаралары дәүләт ветеринария станциясе базасында җирле халыктан алынган гаризалар нигезендә башкарылган.

Дарулар, бинтлар, антисептик һәм зарарсызландыручы чаралар битараф булмаган казанлылар тарафыннан җыелган. Яхшы күңелле кешеләр ярдәме белән хуҗасыз калган хайваннарга ярты тонна азык җыелган.

«Без фронт яны территорияләрендә ветеринария ярдәменә ихтыяҗның ни дәрәҗәдә зур булуын күрәбез. Бу безнең өчен дәвалау эше генә түгел – бу хайваннарга куркынычсызлык хисен кире кайтару һәм иң авыр вакытларда кешеләр янында кала торган җан ияләре турында кайгырту ысулы да», - дип сөйләде Светлана Ким.

Волонтерлар бу елның июль аенда беренче экспедиция белән барган булган инде. Хайваннарны «Кошкин дом» приюты бинасында караганнар һәм операцияләрне дә шунда ук ясаганнар. Элек, әлеге базада, ветеринария табибы һәм хирург тикшерүләр үткәрә, операцияләр ясый торган клиника булган.

Татарстан башкаласыннан табиблар килүгә приют волонтерлары дәвалауга мохтаҗ хайваннарны сайлап куйганнар.

«Көчекләр патруле» приюты табиблары Донецкта алты көн дәвамында ярдәм күрсәткән, ике көн буе операцияләр ясаган. Бу көннәрдә хирург бертуктаусыз эшләгән, һәр ярты сәгать саен операция өстәленә яңа хайваннар китерелгән. Барлыгы 30 эт һәм мәчегә операция ясалган. Нигездә, бу хайванны үрчетү сәләтеннән мәхрүм итүгә юнәлдерелгән хирургик процедуралар булган.

Экспедиция вакытында команда Красногоровка шәһәренә барып, кешеләр белән беррәттән хезмәт итә торган мәчеләрне һәм этләрне дәвалау өчен алып кайтканнар. «Хәрби хезмәткәрләрнең гомерләрен саклап калуда хайваннар мөһим роль уйный. Пилотсыз аппаратлар очканда, этләр өрә башлый. Шул рәвешле, сугышчылар дроннар очуын аңлый», - дип билгеләде экспедиция җитәкчесе Светлана Ким.

Кирәкле медицина ярдәме күрсәтелгәннән соң, йортсыз хайваннар «Кошкин дом» карамагына тапшырыла. Приютта аларга яңа хуҗалар табарга тырышалар. Волонтерлар җиде хайванны үзләре белән Казанга алып кайткан. Ике песи һәм өч көчеккә яңа хуҗалар табылган, тагын ике песине «Көчекләр патруле» клиникасында дәвалыйлар.

Казан волонтерлары 2026 елның язында янә гуманитар миссияне үтәү өчен яңа планнар белән яши.

«Әлбәттә, мондый шартларда эшләү бик авыр, ләкин коткарылган хайванның сиңа ышана башлавын күргәч, операция өстәлендә үткәрелгән һәр минутның бушка узмаганын аңлыйсың. Без, булдыра алганча, ул якларга кире барачакбыз», - дип сүзен йомгаклады Светлана Ким.

Шулай ук укыгыз

Барлык яңалыклар