МУП «Водоканал»: «Быел челтәрләрне реконструкцияләү нәтиҗәсендә, казанлыларның өчтән бер өлешенә хезмәт күрсәтү яхшырачак»

Предприятие ТР башкаласының 39 участогында инженерлык коммуникацияләрен ремонтларга планлаштыра

Быел Казанда инженерлык коммуникацияләрен реконструкцияләү өчен 1 млрд 922 млн сум каралган. Акча Татарстанда коммуналь инфраструктура челтәрләрен модернизацияләү программасы буенча бүлеп бирелгән, ул федераль бюджеттан финанслана. Бу хакта республика министрлар кабинетында узган брифингта билгеле булды.

«Водоканал» МУП 39 объектта инженерлык челтәрләрен реконструкцияли, шуларның 19 ы төбәк программасына кертелгән. «Бүгенгә Сафиуллин, Парин, Толстой урамнарында, Себер трактында һәм Магазинная һәм Красиков урамнары киселешендә урнашкан биш участокта 4 км торба үткәргеч үткәрү эшләре тулысынча төгәлләнгән», – дип хәбәр итте предприятие генераль директорының беренче урынбасары Марат Сәләхов.

12 км озынлыктагы тагын 11 объектта эшләр дәвам итә, шуларның җидесе әзерлек дәрәҗәсендә. Алар Каспий, Окраинная, Бертуган Касыймовлар, Патрис Лумумба, Дорожная, Кызыл Позиция һәм башка урамнарда урнашкан. Марат Сәләхов калган өч объектта (Гадел Кутуй, Альберт Камалеев, Профессор Камай урамнарында) эшнең якын арада башланачагын әйтте.

Реконструкциянең гомуми бәясе 1 млрд 73 млн сум тәшкил иткән, шуларның 663 млн – предприятиенең үз акчалары.

Моннан тыш, республика хөкүмәте һәм Казан мэриясе ярдәме белән быел БРИКС саммитына әзерлек кысаларында Пушкин, Мәскәү, Островский, Вишневский, Назарбаев һәм Чистай урамнары буйлап 4 км озынлыктагы тузган челтәрләр реконструкцияләнде.

«Бу эшләр нәтиҗәсендә 400 меңнән артык шәһәр кешесенә хезмәт күрсәтү яхшырачак – бу Казанда яшәүчеләрнең өчтән бере», – дип ассызыклады спикер.

Марат Сәләхов искә төшергәнчә, 2021 елда Татарстан республикасы Төзелеш министрлыгы тарафыннан 2028 елга кадәр гамәлгә ашырыла торган 9,5 млрд сумлык өстәмә инвестицион программа эшләнгән һәм расланган. Ике ел эчендә аның буенча 30 урам буенча 25 км су белән тәэмин итү челтәре реконструкцияләнгән.

Казанда җылылык белән тәэмин итү челтәрләрен модернизацияләүгә 194 млн сум каралган, шуның 109 млн сумын «Казэнерго» АҖ җибәргән. Әлеге акчаларга алты объектта 5 км озынлыктагы челтәрләр алыштырылачак.

Предприятиенең генераль директоры Фәнис Нурмөхәммәтов сөйләвенчә, бүгенгә Бертуган Касыймовлар, Гвардия һәм Даурская урамнары тулысынча тәмамланган. «Реконструкция расланган график нигезендә алып барыла, эшләрне тәмамлау вакыты – 30 август», – дип хәбәр итте спикер.

Исегезгә төшерәбез, Казанда «Водоканал» МУП 3619 км торба үткәргечләргә, чистарту корылмаларына, җир өстендәге су алуларга, җир астындагы грунт су алуларына, 200 дән артык насос станциясенә, инженерлык саклау гидрокораллары комплексына һәм сигез кар эретү станциясенә хезмәт күрсәтә.

Шул ук вакытта «Казэнерго» АҖендә 702 км җылылык челтәре кулланылышта, алар 59% ка тузган. Коммуналь инфраструктура челтәрләрен модернизацияләү программасын гамәлгә ашыруның ике ел вакыты эчендә реконструкциягә 400 млн сум юнәлдерелгән. Шул ук вакытта узган ел 10 км диярлек озынлыктагы тузган челтәрләрне алмаштыруга ирешелде.

Шулай ук укыгыз

Барлык яңалыклар