Казанның муниципаль парковкалары сентябрьгә кадәр ташламалы режимда эшләячәк

Пандемия чорында Казан Мэры кушуы буенча кертелгән кризиска каршы чараларның нәтиҗәләре турында эшлекле дүшәмбе барышында сөйләделәр.

Фото: Марат Мугинов

(Казан шәһәре KZN.RU, 12-нче июль, Ксения Швецова). Казанда муниципаль парковкалар эше сентябрьгә кадәр ташламалы режимда дәвам итәчәк. Шулай ук эшкуарланы шәһәр халкының гомеренә һәм сәламәтлегенә куркыныч тудырмый торган төзекләндерү кагыйдәләрен бозган өчен элеккечә штрафка тартмаячаклар. Бу хакта бүген эшлекле дүшәмбедә Башкарма комитет җитәкчесе урынбасары Илдар Шакиров хәбәр итте. Исегезгә төшерәбез, кече һәм урта эшмәкәрлек вәкилләренә ярдәм итү өчен әлеге һәм башка ташламалар Казан Мэры Илсур Метшин йөкләмәсе буенча кертелде.

Муниципаль парковкаларның алга таба эш режимы эшмәкәрлек белән диалогта билгеләнәчәк

Хәзер ташламалы чорда парковка өчен түләү бары тик эш көннәрендә 7:00 сәгатьтән 18:00 сәгать кадәр генә алына. Калган вакытта, шул исәптән шимбә, якшәмбе һәм бәйрәм көннәрендә парковкалар бушлай кала. Элегрәк алар эш көннәрендә 7:00 сәгатьтән 21:00 сәгатькә кадәр, шулай ук шимбә көнне 21:00 сәгатькә кадәр түләүле иде, дип искәртте И.Шакиров.

«Рестораторлар фикеренчә, бу ярдәм чарасы клиентларны җәлеп итәргә ярдәм итә, чөнки аларга үз автомобильләрен бушлай калдыру уңайлы, – дип өстәде ул. – Парковкаларның алга таба эш режимы турындагы карарны без эшкуарлар белән диалогта кабул итәчәкбез, нигезләмәгә һәм агымдагы вәзгыятькә таяначакбыз».

Штрафларга моратория ярдәмендә эшмәкәрләр 117 млн сум акчаны янга калдырган

Шулай ук Казанда пандемия шартларында эшкуарларга ярдәм итү өчен кабул ителгән башка кризиска каршы чаралар да дәвам итә. Мәсәлән, агымдагы елның I-IV кварталында реклама конструкцияләрен урнаштыруга һәм эксплуатацияләүгә түләүләрне кичектерү.

Моннан тыш, икенче җәйге сезонны рестораторлар верандаларны үз оешмалары каршында бушлай урнаштыра. Ел башыннан объектларны урнаштыру схемасына верандага 161 урын кертелгән, 90 килешү төзелгән.

Апрель аена кадәр гамәлдә булган штрафларга мораторий да ярдәм итүнең нәтиҗәле чараларының берсе булды. Гражданнар тормышы һәм сәламәтлеге өчен куркыныч тудырмый торган төзекләндерү кагыйдәләрен бозу очракларында тикшерүчеләр бары кисәтү белән генә чикләнде. Узган елның 20-нче мартыннан башлап хокук бозулар буенча 4043 кисәтү чыгарылган, алар буенча штраф рәвешендә җаваплылык каралган. Әгәр дә бу хокук бозулар буенча минималь штраф салынса, эшмәкәрләргә 117 млн сум түләргә туры килер иде.

«Безнең максат – түләттерү түгел, ә тәртип тәэмин итү»

Бу эшнең төп принциплары саклана, дип хәбәр итте И. Шакиров. «Хәзер мораторий озайтылмаган, әмма узган ел дәвамында без эшләгән эш форматы калачак. Шәһәрлеләрнең тормышына һәм сәламәтлегенә куркыныч янамый икән, без штраф санкцияләре салмаска, ә эш тәртибендә бозуларны бетерү мөмкинлеген бирергә тырышабыз. Безнең максат – түләттерү түгел, ә тәртип тәэмин итү», – дип аңлатты Башкарма комитет җитәкчесе урынбасары.

Казанда кабул ителгән барлык ярдәм чаралары аларны эшмәкәрләр үзләре тәкъдим иткәнгә күрә нәтиҗәле булды, дип билгеләп үтте Башкарма комитет җитәкчесе Рөстәм Гафаров. «Хәзерге катлаулы ситуациядә бизнес-бергәлек белән даими диалог алып барырга кирәк, бу кулны пульста тотарга һәм теләсә нинди үзгәрешләргә тиз җавап бирергә мөмкинлек бирәчәк», – дип йомгаклады ул.