Реклама конструкциясен урнаштыруга рөхсәт бирү буенча муниципаль хезмәт электрон форматка күчерелде

Рөхсәт бирү вакыты 12 дән 8 көнгә кадәр кыскартылды.

Фото: Марат Мөгыйнов

(Казан шәһәре KZN.RU, 14 нче февраль, Алинә Бережная). Казанда реклама конструкциясен урнаштыруга рөхсәт бирү, шулай ук мондый рөхсәтне гамәлдән чыгару, рөхсәт документларына үзгәрешләр кертү буенча муниципаль хезмәтне электрон форматка күчерделәр. Бу хакта бүгенге эшлекле дүшәмбе вакытында Казанның Тышкы реклама идарәсе башлыгы Әскәр Баһаветдинов сөйләде.

2021 елның гыйнварыннан документларны дистанцион рәвештә Казан җирле үзидарә органнарының рәсми порталында, шулай ук ТР Дәүләт хезмәтләре порталында тапшырырга һәм рөхсәт алырга мөмкин.

«Ел дәвамында Идарә муниципаль хезмәтләр реинжинирингы буенча эш алып барды. Беренче этапта муниципаль хезмәт алганда гаризалар бирү процедурасын гадиләштерергә һәм таләп ителә торган документлар санын гына түгел, материалларны карау вакытын да кыскартырга мөмкинлек биргән норматив хокукый актларга кирәкле үзгәрешләр кертелде», – дип хәбәр итте А.Баһаветдинов. Әйтик, хәзер сату нәтиҗәләре буенча рөхсәт алу өчен гариза биргәндә гариза бирүчегә башка график материаллар, топографик фотога төшерү таләп ителми. Ул гариза гына бирә, ә күрсәтелгән материалларны Идарә үзе әзерли.

Реклама конструкцияләрен урнаштыруга рөхсәт бирү вакыты 12 көннән 8 көнгә кадәр кыскартылды. Шул ук вакытта федераль законнарда 60 көн вакыт каралган, дип билгеләп үтте Әскәр Баһаветдинов.