Мошенниклар медицина хезмәткәре сыйфатында казанлыларга тормышны коронавирустан иминиятләштерергә тәкъдим итә

Полиция хезмәткәрләре шәһәр халкын уяу булырга чакыра.

Фото: Марат Мугинов

(Казан шәһәре KZN.RU, 26-нчы декабрь). Татарстан башкаласында мошенниклар медицина хезмәткәрләре булып казанлыларга тормышны коронавирстан иминиятләштерергә тәкъдим итә. Полиция хезмәткәрләре шәһәр халкын уяу булырга чакыра.

25-нче декабрьдә Россия Эчке эшләр министрлыгының Казан буенча идарәсенең «Восход» полиция бүлегенә 74 яшьлек хатын-кыз мөрәҗәгать итте. Пенсионер хәбәр иткәнчә, аның өенә аңа билгесез ике хатын-кыз килгән, үзләрен шәһәр хастаханәләренең берсенең хезмәткәре дип таныштырганнар һәм авыруның тормышын коронавирустан иминиятләштерергә тәкъдим иткәннәр.

«Иминиятләштерү» бәясе 30 мең сум тәшкил иткән. «Медицина хезмәткәрләренә» ышанып, зыян күрүче аларга кирәкле сумманы биргән. Соңрак, туганнары белән киңәшкәннән соң, ул үзен алдаганнарын аңлаган һәм полициягә мөрәҗәгать иткән.

Соңрак мондый гариза белән полициягә тагын бер пенсионер килгән, ул «тормышны иминиятләштерүне» 15 мең сумга рәсмиләштергән. Ике зыян күрүче дә бер йортта яши икән.

Ике факт буенча да «Караклык» маддәсе буенча җинаять эшләре кузгатылган. Оператив-эзләү чаралары алып барыла.

ТР буенча Эчке эшләр министрлыгы казанлыларны уяу булырга чакыра һәм медицина хезмәткәрләре өйләргә йөрми һәм тормышны иминиятләштерү белән шөгыльләнми, дип кисәтә. Мошенникларның хәйләләренә эләкмәс өчен, таныш булмаган кешеләрдән аларның теге яки бу учреждение хезмәткәрләре булуын раслый торган документ сорарга кирәк. Моннан тыш, шундый хезмәткәр барлыгына инану өчен күрсәтелгән учреждениегә шалтыратырга кирәк, дип хәбәр иттеләр министрлыкның матбугат хезмәтендә.

Шулай ук укыгыз

Барлык яңалыклар