Мошенниклар Казанда яшәүче пенсионер ханымны 120 мең сумга алдаган

Хокук саклау органнарының ялган хезмәткәре зыян күрүчегә оныгының юл-транспорт һәлакәтендә гаепле булуын хәбәр иткән.

Фото: Марат Мөгыйнов

(Казан шәһәре KZN.RU, 2 нче февраль). Казанда чираттагы телефон мошенниклыгы очрагы теркәлгән.

Казанда яшәүче ханымның кесә телефонына билгесез абоненттан шалтырату килгән. Ир кеше үзен хокук саклау органнары хезмәткәре дип таныштыра һәм пенсионерга оныгының юл-транспорт һәлакәтендә гаепле булуын хәбәр итә.

Әңгәмәгә «оныгы» кушыла һәм, җаваплылыктан качарга ярдәм итү өчен, зыян күрүчедән 900 мең сум акча сорый. Пенсионерның мондый суммасы булмый, әмма ул үзендә булган 120 мең сумны бирергә ризалаша. Күрсәтелгән вакытта зыян күрүчегә курьер килә һәм акчаларны алып китә. Шуннан соң пенсионер полициягә хәбәр итә.

«Танкодром» полиция бүлегендә РФ Җинаять кодексының 159 нчы маддәсендәге 2 нче өлешендә каралган «Мошенниклык» җинаять билгеләре буенча җинаять эше кузгатылган. Хәзер җинаятьтә гаеплеләрне эзлиләр, дип хәбәр итә Россия Эчке эшләр министрлыгының Казан буенча идарәсе матбугат хезмәте.

Россия Эчке эшләр министрлыгы мошенниклык очраклары арту сәбәпле, халыктан игътибарлы булуларын сорый. Ялган банк хезмәткәрләреннән шалтыратулар бүгенге көнгә кадәр иң популяр мошенниклык төре булып кала бирә.

Шулай ук укыгыз

Барлык яңалыклар