«Безгә барыбер түгел» яшьләр хәрәкәте беренче экочарасын оештыра

Биредә мастер-класслар, лекцияләр, шулай ук икенчел чималны кабул итү пунктлары оештырылачак.

(Казан шәһәре KZN.RU, 23-нче октябрь). 26-нчы октябрьдә Казанда «Безгә барыбер түгел» проектында катнашучыларның беренче очрашуы узачак. Татарстан башкаласының битараф булмаган барлык шәһәрлеләрен һәм кунакларын очрашуда оештырылачак мастер-классларда, лекцияләрдә һәм экотоварлар ярминкәсендә катнашырга чакыралар.

Кунаклар һәм катнашучылар алдында экоспикер, волонтер һәм журналист Кира Камалова чыгыш ясаячак, Европа матбугат фотоагентлыкларының берсенең эшләре һәм Диңгез фаунасын саклау җәмгыяте эшләре күргәзмәсе эшләячәк. Моннан тыш, биредә икенчел чималны кабул итү пунктлары урнаштырылачак.

3-нче августта старт алган «Безгә барыбер түгел» беренче конкурсына йомгак ясау чараның кульминациясе булачак. Конкурста катнашучылар актуаль темаларга роликлар ясадылар. Сайлап алуның турыдан-туры этабына 84 эш үтте, аларның 30%-тан артыгы экологиягә багышланган иде. Финалга 17 проект чыкты.

Экологик очрашу 26-нчы октябрьдә «Спартак» киңлегендә түбәндәге адрес буенча узачак: Спартак урамы, 2б йорт, дип хәбәр итә ТР Яшьләр эшләре министрлыгы матбугат хезмәте.

Оештыручылар шулай ук «Безгә барыбер түгел» хәрәкәте кысаларында ел дәвамында башка чаралар да оештырылачак, анда шәһәрлеләр актуаль проблемалар турында сөйли алачак, дип билгеләп үттеләр.

Шулай ук укыгыз

Барлык яңалыклар