Казан яшьләрен «Яшүсмер» клубларында Ачык ишекләр көненә чакыралар

Программада — танышу экскурсиясе, спорт һәм өстәл уеннары, мастер-класслар һәм башкалар

17 майда Казанның яшьләр клубларында Ачык ишекләр көне узачак. Кунаклар өчен танышу экскурсиясе үткәреләчәк һәм ел дәвамында язылырга мөмкин булган «Яшүсмер» МБУ түгәрәкләре һәм секцияләре турында җентекләп сөйләячәкләр.

Казанда «Яшүсмер» МБУ челтәрендәге 66 яшьләр клубы эшли, аларда бюджет нигезендә 14 яшьтән 35 яшькә кадәрге яшүсмерләр һәм яшьләр шөгыльләнә. Яшүсмерләр клубларында иҗат, спорт, патриотик, сәнгать һәм техник юнәлешләр буенча дәресләр үткәрелә. Моннан тыш, клубларда сәламәтлек мөмкинлекләре чикләнгән кешеләр өчен түгәрәкләр һәм секцияләр бар.

Яшьләр актерлык һәм ораторлык осталыгы буенча дәресләргә бушлай йөри, чүлмәк һәм күн эшен үзләштерә, гитарада уйнарга өйрәнә яки рок-студиягә кушыла ала. Актив яшәү рәвешен яратучылар өчен йога, армрестлинг секцияләре, тренажер заллары һәм башка спорт юнәлешләре ачылды.

Шулай ук клуб территорияләрендә «ирекле киңлекләр» эшли, анда дуслар белән өстәл уеннары артында вакыт үткәрергә яки китаплар укырга мөмкин.

Ачык ишекләр көне 17 майда шәһәрнең барлык районнарындагы «Яшүсмер» клубларында узачак, адресларның тулы исемлеге белән яшьләр клублары челтәренең телеграм-каналында танышырга мөмкин. Башлана 15:00 сәгатьтә.

Шулай ук укыгыз

Барлык яңалыклар