ТР Сәламәтлек саклау министрлыгы: мәктәпләрне дистанцион укытуга күчерү планлаштырылмый

Татарстанда 1,4 мең сыйныф укудан читләштерелгән.

Фото: Денис Гордийко

(Казан шәһәре KZN.RU, 28 нче гыйнвар, Алинә Бережная). Татарстан мәктәпләрендә яңа коронавирус инфекциясе белән авыру очраклары ачыклана, гомумән алганда, хәзер 1,4 мең сыйныф укудан читләштерелгән. ТР Мәгариф һәм фән министры урынбасары Алсу Асадуллина сүзләренә караганда, мәктәп укучыларын дистанцион укытуга күчерү планлаштырылмый.

«Мәктәпләрдә барлык профилактик чаралар да уздырыла – барлык классларда да бактерицид лампалар бар, бүлмәләр җилләтелә, массакүләм чаралар үткәрмибез, барлык укучылар иртәнге фильтр уза», – дип хәбәр итте Алсу Асадуллина. Шул ук вакытта кискен респиратор-вируслы инфекцияләр һәм грипп белән авыруга шик булган очракта, укытучылар ата-аналарны балаларын өйдә калдырырга өнди.

Якындагы шимбәдә, 29 нчы гыйнвар көнне, Татарстанның барлык мәктәпләрендә саф һавада чаралар узачак. Дәресләр форматын һәр уку йорты үзе сайлаячак. ТР Мәгариф һәм фән министры урынбасары сүзләренә караганда, бу спорт ярышлары, мәдәни-танып белү һәм гаилә чаралары булырга мөмкин. Балалар урамда булганда, мәктәпләрдә генераль җыештыру, зарарсызландыру һәм җилләтү үткәреләчәк. «Ял көннәрендә без, дүшәмбе көнне балалар чиста мәктәпләргә килсен өчен, барлык кирәкле профилактик чараларны тулысынча уздырачакбыз. Болар барысы да коронавирус инфекциясе таралуны булдырмый калырга ярдәм итәчәк», – дип билгеләп үтте Алсу Асадуллина.

Шулай ук укыгыз

Барлык яңалыклар