ТР Төзелеш министрлыгы: быел Татарстанда 2 млн 755 мең кв. метр торак төзеләчәк

Капиталь ремонт 760 күп фатирлы йортта планлаштырылган.

Фото: Денис Гордийко

(Казан шәһәре KZN.RU, 9 нчы март). Татарстан 2021 елда торак төзелеше өлкәсендәге күрсәткечләр буенча Идел буе федераль округы буенча беренче һәм Россиядә алтынчы урынны алды – республикада 3 млн квадрат метрдан артык торак фонды файдалануга тапшырылды. Бу хакта бүген ТР Министрлар Кабинетында узган брифингта ТР Төзелеш, архитектура һәм торак-коммуналь хуҗалык министры Марат Айзатуллин хәбәр итте.

«Республикада берничә ел дәвамында аерым категория гражданнарны торак белән тәэмин итү буенча дүрт программа эшли. 2022 елда 677 гаилә торак алырга тиеш, шул исәптән 600 ятим бала, 22 күп балалы һәм 50 яшь гаилә, шулай ук 5 аерым категориядәге гражданнар вәкилләре», - дип сөйләде министр.

2022 елга Татарстанда барлыгы 2 млн 755 мең кв. метр торакны файдалануга тапшыру планлаштырыла: 148 күп фатирлы йорт, «Татарстан Республикасы Президенты каршындагы Дәүләт торак фонды» инвестицион программасы кысаларында 56 йорт һәм 12 мең 454 шәхси йорт. Гомумән алганда, соңгы өч елда торакны файдалануга тапшыру буенча тотрыклы күрсәткечләр күзәтелә – елына 2 млн 600 мең кв. метр чамасы.

Татарстанда 2008 елдан бирле тормышка ашырыла торган күп фатирлы йортларга капиталь ремонт ясау да дәвам итәчәк. Бу вакыттан бирле 11 мең 508 йорт ремонтланган, аларда 2 млн татарстанлы яши. Быел капиталь ремонт гомуми мәйданы 4 млн 756 мең кв. метр булган 760 йортта узачак. «Социаль-мәдәни объектларны төзү, реконструкцияләү, капиталь ремонтлау һәм инженерлык инфраструктурасын модернизацияләү буенча республика программалары үз эченә 3,5 меңнән артык объектны ала», – дип билгеләп үтте Марат Айзатуллин.

Социаль өлкә объектларына килгәндә, быел 53 мәктәп, 22 балалар бакчасы, 5 балалар сәнгать мәктәбе һәм 11 ресурс үзәге, 167 мәктәптә азык-төлек блогы яңартылачак. Шулай ук быел старт алган яңа программа буенча 8 яшьләр үзәге, 11 яшүсмерләр клубы, 6 лагерь, 15 психологик-педагогик ярдәм үзәге бинасы капиталь ремонтланачак.

Стационарларны төзү һәм капиталь ремонтлау программасы буенча 26 медицина учреждениесе яңартылачак, 7 объект төзеләчәк, фельдшер-акушерлык пунктлары, патологоанатомия бүлекләре төзелеше һәм сәламәтлек саклау объектларын капиталь ремонтлау программасы буенча – 32 объект.

Спикер республикада спорт инфраструктурасын камилләштерү дә дәвам итәчәклеген җиткерде. Планда – 4 универсаль мәйданчык, бер блок-модульле чаңгы базасы һәм 6 ябык футбол манежы төзү, шулай ук 24 объектны капиталь ремонтлау.

Шулай ук укыгыз

Барлык яңалыклар