Казанда буран, кар һәм секундына 18 метр тизлектә җил булуы көтелә

14-нче гыйнвар көнне ТР башкаласында һава температурасы –10 градус тәшкил итәчәк.

Фото: Денис Гордийко

(Казан шәһәре KZN.RU, 13-нче гыйнвар). ТР Гидрометеорология һәм әйләнә-тирә мохитне күзәтү идарәсе халыкны һава шартларының начараюы турында кисәтә. Казанда кар, буран, көчле җил көтелә, урыны белән секундына 15-18 метр тизлеккә кадәр. Юлларда кар көртләре, бозлавык булырга мөмкин. Төнлә һава температурасы –10–12 градус, иртәгә көндез –8–10 градус салкын булачак.

Гомумән алганда, Татарстан буенча шулай ук кар, көндез һәм кич белән көчле буран, урыны белән секундына 15-20 метрга кадәр тизлектә җил булыр дип фаразлана. Төнлә һава температурасы –8–13 градус, көндез – минус 6 градустан –11 градуска кадәр. Юлларда кар көртләре, урыны белән бозлавык сакланачак, дип хәбәр ителә ТР Гидрометеорология һәм әйләнә-тирә мохитне күзәтү идарәсе сайтында.

Россия Гадәттән тыш хәлләр министрлыгының Татарстан Республикасы буенча баш идарәсе көчле буран чыккан очракта биналардан бары тик аерым очракларда гына чыгарга киңәш итә. Автомобильдә бары тик киң юллар һәм шоссе буенча гына хәрәкәт итү яхшы.

Машина йөртүчеләргә, бигрәк тә ерак араларга барырга планлаштыручыларга, машинаның техник торышына аеруча игътибар итәргә кирәк. Ягулыкны тикшерелгән автозаправка станцияләрендә салу мөһим. Алдан ук җылы әйберләр һәм продуктлар тупларга, үзең белән мобиль телефон өчен зарядка җайланмасы алырга кирәк.

ТР буенча Эчке эшләр министрлыгының Дәүләт автоинспекциясе, үз чиратында, юл хәрәкәте кагыйдәләрен тайпылышсыз үтәү зарурилыгы турында искә төшерә һәм автомобильчеләрне һәм җәяүлеләрне игътибарлы һәм сак булырга чакыра.

Катлаулы метеорологик шартларда транспорт чараларын йөртүчеләр максималь рөхсәт ителгән хәрәкәт тизлегенә таянып эш итәргә тиеш түгел, ә килеп туган вәзгыятьтә куркынычсызлыкны тәэмин итәрлек тизлекне сайларга кирәк. Каршы яктан хәрәкәт итү өчен билгеләнгән юлга чыгу белән бәйле куркыныч маневрлардан тыелып торырга кирәк. Шулай ук куркынычсызлык каешын эләктерергә һәм куркынычсызлык каешын эләктергән пассажирларны йөртергә кирәк.

Җәяүлеләр юл аша, хәрәкәтнең куркынычсызлыгына инанганнан соң, бары тик җәяүлеләр юлы буенча һәм светофорның рөхсәт итә торган сигналына гына чыгарга тиеш. Тәүлекнең караңгы вакытында яки күз күреме начар булу шартларында үзең белән яктылык кайтаручы элементлар булу мөһим.

Шулай ук укыгыз

Барлык яңалыклар