В целях анализа посещаемости и улучшения работы портала мы используем сервис «Яндекс.Метрика». Оставаясь на нашем портале, Вы выражаете свое согласие на обработку Ваших данных указанным сервисом.
Яңалыклар
29.12.2023, 13:30
Казан Мэриясе: «Сезнең белән бергә без Татарстан башкаласын беренче күрүдән үк гашыйк була торган шәһәр итәбез»
Шәһәр Башкарма комитеты бүлекчәләре җитәкчеләре халыкны якынлашып килүче Яңа ел белән котладылар һәм бәйрәмнәргә үз планнары белән уртаклаштылар
Фото: Денис Гордийко
(Казан шәһәре KZN.RU, 29 нчы декабрь, Камилә Вилданова, Диләрә Гафурова). 2024 елга кадәр берничә көн калды. Татарстан башкаласын яңа ел иллюминациясе һәм якты арт-объектлар белән бизәделәр инде. Казанлылар соңгы эшләрен тәмамлаган арада – бүләкләр сатып алалар һәм чыршылар бизиләр – Башкарма комитет бүлекчәләре җитәкчеләре халыкны якынлашып килүче Яңа ел белән котлыйлар һәм бәйрәмнәргә планнары белән уртаклашалар.
Башкарма комитет җитәкчесе урынбасары Гүзәл Сәгыйтова якынлашып килүче каникуллар аның өчен туганнары һәм якыннары белән күрешү, гаиләсе белән вакыт үткәрү, җитәкче түгел, ә хатын һәм әни булу өчен бик яхшы мөмкинлек булачак, дип сөйләде. «Туган якка да кайтып киләсе, әти-әнине, дусларны күрәсе килә. Ялларда күбрәк һавада йөрергә, чаңгыда шуарга, яңа елга көч тупларга исәп», - дип уртаклашты ул.
Казанлыларга Гүзәл Сәгыйтова тынычлык һәм иминлек теләде. «Социаль блок сәламәтлек саклау, мәгариф, мәдәният, спорт һәм яшьләр сәясәте мәсьәләләрен колачлый», – дип искәртте ул. - Һәм мин, беренче чиратта, барлык казанлыларга да күңелләре белән яшь булып калуларын һәм бу өлкәләрдә уңышлар телим. Ныклы сәламәтлек, төпле белемнәр һәм күтәренке рух».
Башкарма комитет җитәкчесе урынбасары Игорь Куляжев хәтта бәйрәмнәрдә дә тырышып эшләргә җыена. Аның сүзләренчә, бу көннәрдә ял итү төзекләндерү өлкәсендәге кеше өчен – рөхсәт ителмәгән затлылык, ә теләсә нинди йөреп кайту тикшереп карап узуга әверелә. «Безнең алда иң мөһим бурыч булып калганнарның Яңа ел бәйрәмнәрен проблемаларсыз уздыра алуы тора. Яңа ел кары сезгә җәрәхәтләр һәм «шишка»лар түгел, ә шатлык китерсен», – дип мөрәҗәгать итте ул казанлыларга.
Игорь Куляжев алдагы бәйрәм көннәрендә халык яхшы ял итәр, вакытларын үзләренә, якыннарына багышлар һәм яраткан шәһәрләре турында онытмаслар дигән өмет белдерде. «Сезнең тормышыгыз яңа елча бизәлгән Казан кебек игелекле вакыйгалар, эчкерсез елмаюлар һәм җылы сүзләр утлары белән балкысын. Сезнең белән бергә без Татарстан башкаласын беренче күрүдә үк гашыйк була торган шәһәр итәбез», – дип мөрәҗәгать итте Игорь Куляжев.
Туризмны үстерү комитеты директоры Дарья Санникованың барлык якыннары һәм туганнары Яңа елны бәйрәм итәргә әбиләре өенә җыелачак. Алар бергәләп ПП-оливье һәм грек йогурты белән классик «Селедка под шубой» салатын әзерләячәкләр. «Без зур бәйрәм өстәле әзерләячәкбез һәм бөтен гаилә белән Кремль курантлары астында яңа 2024 елны каршы алачакбыз», - дип сөйләде Дарья Санникова.
Ул казанлыларга киләсе елда шатлык, илһам һәм яңа мөмкинлекләр теләде. «Үзегезгә яңа офыклар ачарга, төрле культуралар белән танышырга һәм сәяхәтләр рөхсәт итегез», – дип билгеләп үтте Туризмны үстерү комитеты директоры. - Казанда ясаган һәр адымыгыз сезне гаҗәеп урыннарга һәм очрашуларга алып барсын. Татарстан башкаласы – мәдәни мираслы һәм бай тарихлы шәһәр. Бездә һәр сәяхәтне чыннан да онытылмаслык итәр өчен бар нәрсә бар. Яңа елда без сезгә тагын да уникаль маршрутлар һәм вакыйгалар тәкъдим итәрбез».
Яңа ел бәйрәмнәрендә Вахитов һәм Идел буе районнары администрациясе башлыгы Альберт Салихов күбрәк вакытны гаиләсе белән үткәрергә тырышачак, әмма шәһәрдә эш барыбер тукталмаячак.
«Төзекләндерү һәм торак-коммуналь хуҗалык өлкәсе торышын контрольдә тотарга кирәк, шуңа күрә ял көннәрендә мин элемтәдә булачакмын. Бәйрәмнәргә Казанга күп туристлар киләчәк. Без кунакларны һәм шәһәр халкын мөмкин кадәр уңайлы ял белән тәэмин итәргә тиеш. Ял көннәре гражданнарның иминлеге өчен җаваплылыкны бетерми», – дип ассызыклады Альберт Салихов.
Район администрациясе башлыгы казанлыларга гармония, күптән көтелгән дуслар белән очрашулар һәм яңа казанышлар теләде.
Россиядә Педагог һәм остаз елы тәмамлануга карамастан, укучылар укуларын дәвам итәчәк, ә укытучылар белемнәре белән бүлешәчәк. Мәгариф идарәсе башлыгы Ирек Ризванов укучыларга барлык фәннәрдән «бишле»ләр генә алуларын, ә укытучыларга эшләренә күңелләрен биреп карауларын теләде.
«Яңа 2024 елда мәктәп укучыларына яңа фәннәрне җиңел һәм дәртләнеп үзләштерүләрен телим. Киләсе ел безнең барыбыз өчен дә кызыклы, бай, яңа җиңүләр һәм казанышлар белән тулы булыр дип өметләнәм. Киләсе Яңа ел белән!» - дип котлады ул Татарстан башкаласында яшәүчеләрне.
Ныклы сәламәтлексез яхшы эшләп булмый, дип билгеләп үтә ТР сәламәтлек саклау министры урынбасары – Казан Сәламәтлек саклау идарәсе башлыгы Владимир Жаворонков. Ул шәһәр халкына, беренче чиратта, физик һәм психик иминлек теләде.
«Сезне һәм гаиләләрегезне якынлашып килүче бәйрәмнәр белән котлыйм. Ел сезгә уңай эмоцияләр генә китерсен, ә сәламәтлек үзенең тотрыклылыгы һәм тулылыгы белән сөендерсен. Киләсе ел гармония, иминлек һәм уңыш символы булсын. Бәйрәм белән!» - дип мөрәҗәгать итте казанлыларга Владимир Жаворонков.
«Игелекле Казан» коммерцияле булмаган автоном оешмасы җитәкчесе Татьяна Мерзлякова хыялланырга һәм мәрхәмәтле булырга онытмаска кирәк дип тели.
«Казанлылар могҗизаларга балалар кебек ышануларын дәвам итәрләр дип өметләнәм. Яхшылык кылырга онытмагыз. Без бәйрәм көннәрендә дә эшләячәкбез – «Игелекле шугалак», «Игелек бүләк итүче сувенир» витринасы һәм психологик ярдәм хезмәте», – дип билгеләп үтте ул.
Казан Россиянең спорт башкаласы дип танылды. Бөтенроссия һәм халыкара ярышларда җиңүләрдән тыш, агымдагы спорт сезонында шәһәр Мэриясенең «Яшәү яме» проекты буенча «Йөзьяшәрләр уенннары» спартакиадасы старт алды. Физик культура һәм спорт комитеты рәисе Линар Гарипов барлык халыкка, яшьләренә карамастан, сәламәт яшәү рәвеше алып баруларын тели.
«Узып баручы ел спорт вакыйгаларына бай булды. Безнең спорт мәктәпләрендә тәрбияләнүчеләр Бөтенроссия һәм халыкара ярышларда яхшы нәтиҗәләр күрсәттеләр. Бу Казанда иң яхшы тренерлар һәм белгечләр булуын тагын бер кат исбатлый. Киләсе ел да медальләргә бай булуын телибез. Спорт белән шөгыльләнегез һәм сәламәт булыгыз!» - дип мөрәҗәгать итте шәһәр халкына Линар Гарипов.
Фото: Денис Гордийко, Марат Мөгыйнов, Туризмны үстерү комитеты, Мәгариф идарәсе, Гүзәл Сәгыйтованың шәхси архивы
Фоторепортаж
Казан Яңа 2024 елны каршылый
Шулай ук укыгыз
-
28.07.2025, 13:17 -
28.07.2025, 13:14 -
28.07.2025, 13:11 -
28.07.2025, 10:52