Казан Мэры коронавирус инфекциясе таралуга каршы тору штабының чираттагы утырышын уздырды

Илсур Метшин штаб каршында белгечләр - эпидемиологлар һәм вирусологларның эксперт советын булдырырга кушты.

(Казан шәһәре KZN.RU, 3-нче апрель). Бүген Казан Мэры Илсур Метшин шәһәр Башкарма комитетында коронавирус инфекциясе таралуга каршы тору буенча штабның чираттагы утырышын уздырды.

ТР Сәламәтлек саклау министры урынбасары - ТР Сәламәтлек саклау министрлыгының Казан буенча идарәсе башлыгы Владимир Жаворонков инфекция белән бәйле хәл һәм медицина учреждениеләре эше турында сөйләде.

Үз-үзеңне изоляцияләү чорында шәһәр территориясендә хокук тәртибен тәэмин итү буенча агымдагы вәзгыять белән РФ Эчке эшләр министрлыгының Казан буенча идарәсе башлыгы Александр Мищихин таныштырды. Ул интернет буенча эш бирүчеләрдән ялган белешмәләр саткан гражданнарга карата өч җинаять эше кузгатылу турында хәбәр итте. Моннан тыш, ул полиция хезмәткәрләренең бу көннәрдә халык арасында аңлату эшенә басым ясавы турында сөйләде, әмма якын арада үзизоляция режимын бозган өчен шәһәр кешеләрен җаваплылыкка кырысрак җәлеп итә башлаячаклар.

Җәмәгать транспортында пассажирлар агымының кимүе турында Башкарма комитет җитәкчесе урынбасары Илдар Шакиров сөйләде. Казан Мәгариф идарәсе җитәкчесе Ирек Ризванов ташламага ия булучы кешеләр өчен азык-төлек җыелмаларын булдыру һәм шәһәрнең уку йортларын укучыларны дистанцион укытуга әзерләү барышы турында хәбәр итте. Бүген шәһәр мәктәпләре белән ике тест тоташтыруы узды.

Башкарма комитет җитәкчесе урынбасары Искәндәр Гыйниятуллин торак-коммуналь хуҗалык эше турында, ә Башкарма комитет җитәкчесенең беренче урынбасары Азат Нигъмәтҗанов ТР башкаласының төзелеш базарындагы вәзгыять турында сөйләде.

Казан Мэры шулай ук район администрацияләре башлыкларының хисапларын тыңлады, алар карантиндагы халыкны күзәтү ничек оештырылуы турында сөйләделәр.

Илсур Метшин штаб каршында белгечләр - эпидемиологлар һәм вирусологларның эксперт советын булдырырга, шулай ук дистанцион белем алуга күчү белән бәйле барлык мәсьәләләрне җентекләп өйрәнергә һәм мәктәп укучыларының ташламалы категориясе өчен азык-төлек җыелмаларын өзлексез бирүне тикшереп торырга кушты.

Шулай ук укыгыз

Барлык яңалыклар