Казан Мэры Халыкара мәктәпне тәмамлаучыларны тәбрикләде

Шәһәр башлыгы ундүрт укучыга аттестатлар һәм дипломнар тапшырды.

(Казан шәһәре KZN.RU, 24-нче июль, Алинә Бережная). Бүген Казан Мэры Илсур Метшин Халыкара мәктәпне тәмамлау белән котлады. Шәһәр башлыгы ундүрт укучыга аттестатлар һәм дипломнар тапшырды.

«Бүген балалар өчен генә түгел, аларның әти-әниләре өчен дә дулкынландыргыч көн, без чыгарылыш укучыларын олы тормышка озатабыз», - диде Казан Мэры. Ул ассызыклаганча, бүген Халыкара мәктәп Россиядә IB халыкара бакалавриаты аккредитациясен алган иң яхшыларның берсе. «Сез илдәге әлеге аккредитация алган аз санлы мәктәпләрнең берсендә укыдыгыз, бу сезнең белем сыйфаты һәм олы тормышка әзерлек турында сөйли», - дип билгеләде И.Метшин.

Шәһәр башлыгы укучыларга куелган максатларга ирешүдә уңышлар теләде. «Һәрберегез үз юлын тапсын, ә без сезнең ата-аналарыгыз һәм педагогларыбыз белән горурланачакбыз», - дип мөрәҗәгать итте чыгарылыш укучыларына шәһәр башлыгы.

Уку йорты директоры Нияз Гафиятуллин мәктәптә урта звено уку йорты ачылганнан соң 2 ел үткәч барлыкка килгәнен искәртте. Н.Гафиятуллин билгеләп үткәнчә, узган 4 елда укучылар лаеклы нәтиҗәләр күрсәтә алганнар һәм хәзер, мәктәпне тәмамлаганнан соң, әлеге югары күрсәткечне саклап калу мөһим. «Сез безнең мәктәпне зур дөньяда тәкъдим итү миссиясе белән китәсез. Безнең мәктәп турында нәкъ менә сезнең аркылы фикер йөртәчәкләр, һәм сез үрнәк булачаксыз, - диде Н.Гафиятуллин. - Сез барысын да булдырасыз, без сезгә ышанабыз».

14 укучы диплом һәм аттестатлар алды. Алар арасында 8-нче сыйныфта халыкара мәктәпкә кергән Глеб Петров та бар. «Мин сыйныфташларымны сагыначакмын, без зур бер гаилә булдык. Биредә бик яхшы әзерлек иде, алган белемнәрне мин һичшиксез олы тормышта кулланачакмын. Югары уку йортын әле сайлап өлгермәдем, әмма һөнәр һичшиксез IT-өлкә белән бәйле булачак», - дип сөйләде булачак студент.

Исегезгә төшерәбез, Казанның халыкара мәктәбе 2014 елда ачылды. Бүгенге көндә ике башлангыч мәктәп бинасы эшли. 2016 елның 1-нче сентябрендә 6-9 сыйныф укучылары өчен дә ишекләр ачылды. Мәктәп халыкара белем бирү программалары буенча үз эшен алып бара, укытуда балаларны үстерүгә комплекслы алымнар кулланыла.

Шулай ук укыгыз

Барлык яңалыклар