Казан Мэры Илсур Метшин Дәүләт Думасы депутаты Ярослав Нилов белән очрашты

Алар җирле үзидарә органнарының федераль парламент белән үзара хезмәттәшлеге турында фикер алыштылар.

Фото: Марат Мугинов

(Казан шәһәре KZN.RU, 5-нче ноябрь). Казан Мэры Илсур Метшин бүген VII чакырылыш Федераль Җыены Дәүләт Думасының хезмәт, социаль сәясәт һәм ветераннар эшләре комитеты рәисе Ярослав Нилов белән очрашты. Алар җирле үзидарә органнарының федераль парламент белән үзара хезмәттәшлеге турында фикер алыштылар.

Ярослав Нилов ЛДПРда 1997 елдан бирле тора һәм хәзерге вакытта фракция җитәкчесе урынбасары, Дәүләт Думасының хезмәт, социаль сәясәт һәм ветераннар эшләре комитеты рәисе һәм депутат этикасы мәсьәләләре буенча комиссия әгъзасы булып тора.

Яңа дүртенче чакырылыш Казан шәһәр Думасында барлык төп сәяси партияләр тәкъдим ителде, дип билгеләп үтте Илсур Метшин. Шулай итеп, агымдагы елның 11-нче сентябреннән 13-нче сентябрьгә кадәр узган сайлаулар нәтиҗәләре буенча, 50 депутат сайланды, шул исәптән «Бердәм Россия», КПРФ, «Гадел Россия», «Россия коммунистлары», ЛДПР һәм «Үсеш партиясе».

«Дәүләт Думасында, республика парламентында һәм шәһәр Думасында барлык партияләр кешеләр мәнфәгатьләрендә эшли. Шуңа күрә безнең Казан шәһәр Думасы да күп партияле. Без кайбер әйберләргә төрлечә карый алабыз, әмма барыбыз өчен дә төп язылмаган закон - кешеләр мәнфәгатьләрендә эшләү һәм иҗат итү», - диде Татарстан башкаласы башлыгы.

Шуны да билгеләп үтәргә кирәк, бүген Ярослав Нилов шулай ук Татарстан Республикасы Президенты Рөстәм Миңнеханов белән очрашты һәм СОVID-19 пандемиясе чорында гражданнарга ярдәм итү мәсьәләләре буенча фикер алышты, аерым алганда, халыкның якланмаган категорияләренә һәм эшсезләргә социаль ярдәм күрсәтү хакында.

Шулай ук укыгыз

Барлык яңалыклар