Беренчел медицина-санитария ярдәме күрсәтү өчен Казанның медицина оешмаларына 37 автомобиль тапшырылды

Тантанада Рөстәм Миңнеханов, Фәрит Мөхәммәтшин, Илсур Метшин һәм Марат Садыйков катнашты.

Фото: ТР Президенты матбугат хезмәте

(Казан шәһәре KZN.RU, 11-нче декабрь). Казанның медицина учреждениеләре беренчел медицина-санитария ярдәме күрсәтү өчен 37 автомобиль кабул итте. Машина ачкычларын тапшыру тантанасы ТР Дәүләт Советы бинасы каршында узды. Шәһәрнең медицина учреждениеләрен автомобиль транспорты белән тәэмин итүгә сертификатны шәһәрнең баш табиблары һөнәри берләшмәсе җитәкчесе Таиса Черновага Татарстан Республикасы Президенты Рөстәм Миңнеханов тапшырды. Чарада ТР Дәүләт Советы Рәисе Фәрит Мөхәммәтшин, Казан Мэры Илсур Метшин, ТР сәламәтлек саклау министры Марат Садыйков һәм башка рәсми затлар катнашты.

«Без әлеге транспорт халыкка медицина хезмәте күрсәтү сыйфатын яхшыртыр, күбрәк оперативлык бирер, дип саныйбыз. Һәм, әлбәттә, бездә сәламәтлекне саклау һәрвакыт өстенлекле булып кала бирә», – диде Рөстәм Миңнеханов.

Белгечләргә газ баллонлы 37 Lada Largus автомобиле ярдәмгә киләчәк. «Бәләкәч» президент программасы буенча тагын ике «Газель Некст» машинасын Казанның 4-нче номерлы балалар поликлиникасына һәм 7-нче номерлы балалар шәһәр хастаханәсенә тапшырдылар. Бу программаның максаты – өч яшькә кадәрге балаларны бушлай сөт ризыгы белән тәэмин итү, дип хәбәр итә ТР Президенты матбугат хезмәте.

Рөстәм Миңнеханов барлык медикларга, шулай ук хезмәт коллективларына яңа коронавирус инфекциясенә каршы көрәш кысаларында ике ел дәвамында көн саен алып барыла торган эшләре өчен рәхмәт белдерде. Рөстәм Миңнеханов сүзләренчә, иң зур йөкләнеш Татарстан башкаласына туры килә.