ТР Гадәттән тыш хәлләр министрлыгы балыкчыларны коткару өчен Казанда кизү куячак

Коткаручылар һава мендәрле "Хивус-6" катерын файдаланачаклар.

(Казан шәһәре KZN.RU, 5-нче апрель). 6 апрельдә Татарстанда Россия Гадәттән тыш хәлләр министрлыгының ТР буенча баш идарәсенең вакытлыча коткару постлары эшли башлый. Аларның берсе Казанда – Россия Гадәттән тыш хәлләр министрлыгының ТР буенча Кече көймәләр дәүләт инспекциясе үзәгендә урнашачак.

Инспекциянең дәүләт инспекторлары һәм Эзләү-коткару хезмәте коткаручылары Казаннан Лаеш районының Тетеево авылына кадәрге территориядә тәүлек буе кизү торачаклар. Коткаручылар карамагында – һава мендәрле "Хивус-6" катеры.

Шундый ук постлар Яр Чаллы, Чистай, Лаешта, шулай ук Яшел Үзән, Лаеш, Кама тамагы һәм Минзәлә районнарында оештырылачак. Моннан кала, Россия Гадәттән тыш хәлләр министрлыгының Үзәк төбәк үзәге буенча авиация-коткару үзәгенең МТВ1 авиация звеносы “Ми-8” вертолеты очучылары тәүлек буе кизү торачак, дип хәбәр итә ТР Гадәттән тыш хәлләр министрлыгы матбугат хезмәте.

Искәртергә кирәк, бу атнада Татарстанда Идел елгасы аша боз кичүләре ябылды.

Шулай ук укыгыз

Барлык яңалыклар