ТР Гадәттән тыш хәлләр министрлыгы: Яңа ел бәйрәмнәрендә Татарстанда янгыннар саны тотрыклы рәвештә арта

Сәбәпләрнең берсе – пиротехник эшләнмәләрне дөрес кулланмау.

Фото: Казан шәһәре KZN.RU

(Казан шәһәре KZN.RU, 15-нче декабрь, Камилә Гобәйдуллина). Яңа ел бәйрәмнәре вакытында янгын очраклары гадәти көннәргә караганда 20%-ка күбрәк була, дип хәбәр итте бүген «Татар-информ» мәгълүмат агентлыгында узган матбугат конференциясендә ТР янгын күзәтчелеге буенча баш дәүләт инспекторы урынбасары Максим Трущин. Әйтик, 2020 елның 30-нчы декабреннән 2021 елның 10-нчы гыйнварына кадәр 169 янгын очрагы булган, аларда 14 кеше үлгән, тагын 11 кеше җәрәхәтләнгән. Шул ук вакытта Яңа ел бәйрәме көннәрендә аек булмаган затлар гаебе белән килеп чыккан 14 янгын очрагы теркәлгән, 10 кеше һәлак булган.

Максим Трущин сүзләренчә, бу чорда янгынның биш төп сәбәбе бар:

ут белән саксыз эш итү, еш кына исерек хәлдә тәмәке тарту;
җылылык мичләренең һәм төтен чыгару юлларының дөрес урнашмавы;
электр җиһазларын техник эксплуатацияләү кагыйдәләрен бозу;
транспорт чараларыннан файдалану кагыйдәләрен бозу;
ут төртү.

Моннан тыш, бу чорда пиротехник эшләнмәләрне дөрес файдаланмауның 7 факты теркәлгән. Нәтиҗәдә 3 янгын очрагы килеп чыккан, ике өлкән яшьтәге кеше һәм өч бала җәрәхәтләнгән. «Шундый очракларның берсе 5-нче гыйнвар көнне Казанда «Хезмәт» бакчачылык ширкәтендә килеп чыккан. Анда компания Яңа ел каршы алган, салют җибәргән, һәм салют очкынының берсе бакча йортына эләккән. Төзелеш тулысынча диярлек янып беткән, зыян 2 млн сумнан артык тәшкил иткән», – дип сөйләде Максим Трущин.

Кагыйдә буларак, пиротехниканы дөрес кулланмау сәбәпле, кешеләр баш, йөз, кул һәм аяк чугы яралары ала, дип билгеләп үтте спикер. «Әлеге хәлләрне, булган барлык фактларны исәпкә алып, безнең һәм республиканың башка ведомстволары тарафыннан янгын куркынычы янаган хәлләрнең тискәре нәтиҗәләрен һәм килеп чыгу куркынычын киметүгә юнәлдерелгән чаралар комплексы эшләнә. Шуңа күрә 2021 елның 20-нче декабреннән 2022 елның 10-нчы гыйнварына кадәр Татарстан территориясендә янгынга каршы махсус режим кертелә», – диде ул.

31-нче декабрьдән ТР Гадәттән тыш хәлләр министрлыгы хезмәткәрләре көчәйтелгән хезмәт режимына күчерелә. Тәүлек буе кизүдә 2,2 меңнән артык хезмәткәр эшләячәк, 1 меңнән артык техника җәлеп ителгән.

Шулай ук Яңа ел алдыннан балалар белән бәйрәм чаралары үткәрелә торган урыннарда профилактик очрашулар үткәрелә. Гадәттән тыш хәлләр министрлыгы хезмәткәрләре хезмәт күрсәтүче персонал белән сөйләшә, янгын куркынычсызлыгы чаралары турында инструктаж үткәрә һәм янгын системасының төзеклеген тикшерә. Бүгенге көндә республикада 2 меңнән артык объект исәпкә алынган. «Без бу эшне яңа ел чаралары башланганчы ук төгәлләргә планлаштырабыз. Практика күрсәткәнчә, нигездә, режим характерына бәйле хокук бозулар очрый: эвакуация һәм чыгу юлларын томалау, янгынны сүндерү өчен беренчел чаралар җитәрлек булмау, – диде ул. – Янгын очракларының төп өлеше торак секторда булуны исәпкә алып, без шулай ук яңа ел чорында профилактик эш үткәрергә планлаштырабыз. Бу – ишегалларын йөреп чыгу һәм көнкүрештә янгын куркынычсызлыгы чаралары буенча инструктажлар үткәрү».

Шулай ук укыгыз

Барлык яңалыклар