«Петр Фоменко остаханәсе» Казанда «Җәйге төндә күргән төш» спектаклен тәкъдим итәчәк

Мәскәү театры гастрольләре сентябрь ахырында Качалов исемендәге театр сәхнәсендә узачак.

(Казан шәһәре KZN.RU, 3-нче сентябрь). 23-нче һәм 24-нче сентябрь көннәрендә В.И.Качалов исемендәге Казан академия рус Зур драма театры сәхнәсендә «Алтын битлек» фестивале кысаларында Мәскәүдән килгән танылган артистлар катнашында театр гастрольләре узачак.

Фестивальне Уильям Шекспир комедиясе буенча Македония режиссеры Иван Поповски куелышындагы «Җәйге төндә күргән төш» спектакле белән «Петр Фоменко остаханәсе» ачачак. Спектакль 2016 елгы «Алтын битлек» бөтенроссия театр премиясендә «Драмада иң яхшы спектакль, зур форма» номинациясендә җиңүче булып тора.

Исегезгә төшерәбез, «Алтын битлек» фестивале кысаларында 5-нче һәм 6-нчы октябрьдә Г.Камал театры сәхнәсендә А.С.Пушкин исемендәге Мәскәү драма театры артистлары Б.Брехтның «Сезуаннан килгән яхшы кеше» спектаклен тәкъдим итәчәк.

11-нче сентябрьдә Качалов исемендәге театр яңа 230-нчы юбилей сезонын репертуар хиты - П.О.Бомарше әсәре буенча Александр Славутский куелышындагы «Кызыклы көн, яки Фигароның өйләнүе» спектакле белән ача. Шул ук көнне Василий Качаловның тууына 145 ел тулуга багышланган күргәзмә ачылачак. Бу театр музее, А.А.Бахрушин исемендәге Дәүләт үзәк театр музее һәм МХАТ музееның уртак проекты, аның кысаларында бөек рус актерының тормышы һәм иҗаты турында уникаль экспозиция тәкъдим ителәчәк.

17-нче сентябрьдә тамашачылар сезонның беренче премьерасын - Жан Ануй әсәре буенча Илья Славутский куелышында «Караклар балын» күрәчәк, дип хәбәр итә театрның матбугат хезмәте.

Шулай ук укыгыз

Барлык яңалыклар