Быел Казанда «Том Сойер Фест» хәрәкәте остаханәсе эшли башлаячак

Хәзер активистлар Романов күперенең элеккеге терәкләрен реставрацияләү белән мәшгуль

Фото: Денис Гордийко

«Том Сойер Фест» хәрәкәте остаханәсе быел үзенең беренче сезонын ача. Активистларга бина Казан мэриясе тарафыннан бирелгән. Агымдагы елда волонтерлар эше узган көздә Волков урамында төзекләндерелә башлаган «Иске Казан ишегалды» скверында дәвам итәчәк. Җәмәгать киңлегендә реставрацияләнгән тәрәзә йөзлекләре музее оештырылды, дип хәбәр итте ТР Министрлар Кабинетында узган брифингта республика рәисе ярдәмчесе Олеся Балтусова.

Табылган йөзлекләр турында, кагыйдә буларак, кешеләр үзләре хәбәр итә. Активистлар аларны Казан дәүләт архитектура-төзелеш университетына һәм Казан федераль университетына реставрациягә җибәрәләр. «Без үз кулларыбыз белән дә эшли беләбез. Скверда остаханә ачылды, ул ел дәвамында эшләячәк. Казан Мэриясе ярдәме белән без биналы булдык», – дип ассызыклады спикер.

Хәзер тимерчеләр – «Том Сойер Фест» партнерлары – Романов күперенең элеккеге терәкләренә икенче сулыш өрә. Ул – инженерлар Николай Белелюбский һәм Анджей Пшеницкий проекты буенча 1910-1913 елларда Идел аша төзелгән тимер юл күпере. Корылманы реконструкцияләгәндә, аның детальләре саклауга алына. Хәзер алар тутыктан чистартыла, соңрак волонтерлар детальләрне буяячак.

Олеся Балтусова сүзләренә караганда, казанлылар ни өчен волонтерлар көче белән тарихи объектларны реставрацияләү буенча масштаблырак эш алып барылмый дигән сорау белән еш мөрәҗәгать итә икән. Сәбәбе – кайбер йорт хуҗалары моны теләми. Шулай да активистлар ярдәмендә тарихи үзәкнең күп кенә биналары яңартылган.

«Әлбәттә, безне борчыган объектлар күп, мәсәлән, Казандагы Мергасов йорты, реставрациягә мохтаҗ ТР Милли музее. Ләкин бу масштаблы проект. Без әлеге объектлар белән әкренләп шөгыльләнәчәкбез, белешмәләр әзерләячәкбез, тикшерүләр үткәрәчәкбез», – диде спикер.

Бүгенге көндә «Том Сойер Фест» хәрәкәте активистлары ярдәмендә ТР башкаласы үзәгендә барлыгы 16 торак йорт төзекләндерелгән.

Камилә Вилданова