Бизнес-спикерлардан мастер-класслар, концерт һәм опен-маркет – Казанда Россия эшкуарлары көнен билгеләп үтәчәкләр

Бәйрәм чаралары 26-29 нчы май көннәрендә узачак.

Фото: Денис Гордийко

(Казан шәһәре KZN.RU, 25 нче май). 26-29 нчы май көннәрендә Казанда Россия эшкуарлары көненә багышланган чаралар узачак. ТР башкаласы халкы һәм кунаклары шәһәр урамнарында оештырылачак бәйрәм программасына кушыла, мастер-классларда була, опен-маркетта җирле җитештерүчеләр продукциясен сатып ала, татар ашларын авыз итә һәм концерт тыңлый ала.

Әйтик, 26 нчы май көнне 13:00 сәгатьтә Петербург урамындагы Эшкуар йорты янында Татарстан эшкуарларының һәм үзмәшгульләренең эшләнмәләреннән күргәзмә-сату ачыла. Бөтен республикадан 50 дән артык экспонент үз продукциясен – гаилә столярлык остаханәләре эшләнмәләреннән алып фермер продуктларына кадәр, шулай ук милли эшләнмәләр – бижутерия, сумкалар, кием-салым һәм тәм-томнар тәкъдим итәчәк. Ярминкәдә яшь эшкуарларны (8 яшьтән өлкәнрәкләр) күрергә һәм аларның проектларына ярдәм итәргә мөмкин булачак. Татар һәм стрит-кухня ашлары һәм эчемлекләре белән фуд-корт зонасы аерым тәкъдим ителәчәк.

Эшкуар йортының үзендә 13:00 сәгатьтә илнең төрле төбәкләреннән профессиональ бизнес-спикерлардан 4 мастер-класстан торган белем бирү программасы башлана. Программа һәм теркәлү сылтама буенча ачык, дип хәбәр итә ТР Икътисад министрлыгының матбугат хезмәте.

16:00 сәгатьтә Петербург урамында республика артистлары һәм музыкантлары катнашында кичке күңел ачу программасы старт ала.

Шулай ук 27-29 нчы май көннәрендә ТР Фәннәр академиясе янында (Бауман ур., 20) 8:00 дән 20:00 гә кадәр ярминкә оештырылачак – республиканың 150 гә якын үзмәшгуле үз продукциясен тәкъдим итәчәк. Шәһәр халкы азык-төлек – кайнатма, өй сыры, как, тәм-томнар, шулай ук крафт сувенирлар – бизәнү әйберләре, күн, текстиль, таш, агач эшләнмәләр һ.б. сатып ала алачак.

Чаралар «Кече һәм урта эшкуарлык һәм шәхси эшкуарлык инициативасына ярдәм» илкүләм проекты кысаларында узачак. Бәйрәм программасын ТР Икътисад министрлыгы ярдәмендә ТР Эшкуарлыкка ярдәм итү фонды оештыра.

Россия эшкуарлары көне ел саен 26 нчы майда билгеләп үтелә.

Шулай ук укыгыз

Барлык яңалыклар