Казанда 5-нче номерлы трамвай маршруты ике тукталышка озайтыла

Казанда Бакый Урманче урамында Оренбург юлыннан Мидхәт Булатов урамына кадәр трамвай линиясен төзү эшләре тәмамланып килә.

(Казан шәһәре KZN.RU, 5-нче сентябрь). Казанда Бакый Урманче урамында Оренбург юлыннан Мидхәт Булатов урамына кадәр трамвай линиясен төзү эшләре тәмамланып килә. Шул сәбәпле «Тимер юл вокзалы – «Солнечный город» торак комплексы» маршруты ике тукталышка озайтылачак.

Алга таба маршрутны «Солнечный город» микрорайоны аша Авангард урамына кадәр һәм аннан соң В.Кулагин, Техника, Г.Тукай урамнары аша шәһәрнең үзәк өлешендә боҗралау планлаштырыла, дип хәбәр итә шәһәрнең Транспорт комитеты.

5-нче номерлы трамвай маршруты 2012 елның октябреннән эшли һәм шәһәр халкы арасында аңа ихтыяҗ зур. Көн саен трамвай 30 меңгә кадәр пассажир йөртә.

Исегезгә төшерәбез, Мидхәт Булатов урамыннан Борисково урамына кадәрге участокта юл төзелеше Казанда агымдагы елның июлендә башланды. 800 метр озынлыктагы дүрт полосалы юл Зур Казан боҗрасы кысаларында төзелә.

Транспорт чишелеше төзелеше белән бәйле рәвештә, 2020 елның 20-нче августына кадәр Ферма шоссесы буенча машиналар йөрү өлеше һәм тротуар 11а йортыннан алып Тула урамына кадәр ябылды. Эшләр башкару һәм юллар ябылу сәбәпле 23-нче һәм 56-нчы номерлы автобус маршрутларының хәрәкәт схемасы үзгәрде.

Шулай ук укыгыз

Барлык яңалыклар