Казанда биатлон буенча беренче тапкыр һәвәскәрләр ярышы узачак

Катнашу өчен теркәлергә һәм турнирлар җәдвәле һәм форматы турында барлык актуаль мәгълүматны проектның рәсми сайтында алырга мөмкин.

(Казан шәһәре KZN.RU, 24-нче гыйнвар). 2-нче февральдә Казанда беренче тапкыр биатлон буенча һәвәскәрләр ярышлары узачак. Ату инвентарен ярышларда катнашучыларга оештыру комитеты бирәчәк, ә яңа уенчыларга бушлай тренировка һәм ату дәресләрен уздырачаклар.

Ярышларда катнашучыларга ике ату ноктасы белән 1 чакрымга өч әйләнеш узарга туры киләчәк. Ату өчен газ-баллонлы пневматик винтовкалар биреләчәк. Яшь биатлон яратучылар өчен аерым стартлар оештырылачак: бер ату ноктасыннан 500 метрга кадәр ике әйләнешкә биатлон ярышлары һәм 500 метрлы TimerKids балалар өчен чаңгы ярышы.

Чара «Ак Барс Арена»да узачак. 10.00 сәгатьтә спорт күргәзмәсе эшли башлаячак, катнашучылар старт пакетларын ала һәм ярышларга теркәлә алачак. Шул ук вакытта ачык тренировкалар һәм мәҗбүри ату дәресләре башланачак. Балалар биатлон ярышына – 12.00, чаңгы узышына 13.00 сәгатьтә старт биреләчәк. Төп ярыш 15.30 сәгатьтә башлана.

Катнашу өчен оештыру комитетына медицина учреждениесе мөһере, табиб имзасы һәм мөһере булган медицина белешмәсе бирергә кирәк. Белешмәдә катнашучының үзе сайлаган дистанциягә биатлон ярышларына кертелүе күрсәтелергә тиеш, дип хәбәр итә Timerman спорт чаралары сериясе матбугат хезмәте.

Шулай ук укыгыз

Барлык яңалыклар