Татарстанның иң яхшы ЮХИДИ инспекторы Казанда хезмәт итә

Конкурсның финалында республиканың 28 район һәм шәһәрләреннән 34 юл-патруль хезмәте хезмәткәре катнашкан.

(Казан шәһәре KZN.RU, 18-нче декабрь, Алинә Бережная). Россия Эчке эшләр министрлыгының Казан буенча ЮХИДИ идарәсенең юл-патруль хезмәте полкы инспекторы-полиция лейтенанты Антон Максимов Татарстанның иң яхшы ЮХИДИ инспекторы исеменә лаек булды. Конкурсның финалында республиканың 28 район һәм шәһәрләреннән 34 юл-патруль хезмәте хезмәткәре катнашты.

Конкурсантлар беренче медицина ярдәме күрсәтү, юл хәрәкәтен җайга салу күнекмәләрен, ут әзерлеген һәм юл хәрәкәте кагыйдәләрен белүләрен күрсәттеләр. Инспекторлар шулай ук көрәшнең хәрби алымнарын белү күнекмәләрен тәкъдим итте.

Конкурс нәтиҗәләре буенча беренче урынны Казаннан юл-патруль хезмәте инспекторы 35 яшьлек Антон Максимов алды. Ул полициядә инде 10 ел хезмәт итә. Аның сүзләренә караганда, конкурска үз көчләрен тикшерү өчен барган, әмма җиңү җиңел булмаган – барлык көндәшләр дә яхшы әзерлекле килгән. «Мин ныклап әзерләндем – тренер белән бергә спорт залында шөгыльләндем, көрәш алымнарын өйрәндем, юл йөрү кагыйдәләрен кабатладым, – дип сөйләде Антон Максимов. - Үз көчемә ышаныч һәм һөнәрнең барлык нечкәлекләрен белүем иң яхшысы булырга ярдәм итте».

Яхшы инспектор ия булырга тиешле сыйфатлар турында сөйләгәндә, Антон Максимов шуны билгеләп үтте: «Тыйнаклык, әдәплелек, җаваплылык һәм, әлбәттә, югары гражданлык позициясе».

Һөнәри осталык конкурсында икенче урынны ТР буенча Эчке эшләр министрлыгының ЮХИДИ юл-патруль хезмәте инспекторы-полиция лейтенанты Никита Наумов алды. Өченче урында - Россия Эчке эшләр министрлыгының Казан буенча ЮХИДИ юл-патруль хезмәте полкының юл-патруль хезмәте инспекторы - полициянең өлкән лейтенанты Айрат Латыйпов.

Шулай ук укыгыз

Барлык яңалыклар