Евразия икътисади берлеге, БДБ һәм Шанхай хезмәттәшлек оешмасы илләре лидерларын Казанга «аутрич» форматында узачак БРИКС саммиты утырышына чакырачаклар

Бу хакта РФ президенты ярдәмчесе Юрий Ушаков белдерде

Фото: Марат Мөгыйнов

Евразия икътисади берлеге, БДБ, Шанхай хезмәттәшлек оешмасы илләре лидерларын һәм, бәлки, башка региональ структуралар вәкилләрен Казанга «аутрич» форматында БРИКС саммитында катнашу өчен чакырачаклар. Бу хакта РФ президенты ярдәмчесе Юрий Ушаков ТАСС белән әңгәмәсендә белдерде.

«Быел Россия саммит утырышын «аутрич/БРИКС+» форматында уздырырга планлаштыра. Әлеге формат безгә ошады һәм аны дәвам итәргә уйлыйбыз. Асылда, бу ad hoc форматы, ягъни БРИКС саммитларына халыкара һәм региональ көн тәртибендәге актуаль мәсьәләләрне карап тикшерүгә өлеш кертергә теләгән дәүләтләр лидерлары чакырыла», – дип аңлатты спикер.

Бу уңайдан ул узган ел Көньяк Африка Республикасы хакимияте тарафыннан Йоханнесбургтагы саммитка «Африка континенты илләренең киң даирәсе» чакырылган булуын искә төшерде.

Элегрәк хәбәр ителгәнчә, Кремльдә 2024 елның октябрендә БРИКС саммитын уздыру урыны итеп ни өчен нәкъ менә Казанның сайлануын аңлаттылар. Юрий Ушаков сүзләренә караганда, ТР башкаласында дөнья лидерлары очрашуын лаеклы дәрәҗәдә оештыру өчен кирәкле һәр нәрсә дә бар.

Шулай ук укыгыз

Барлык яңалыклар