Ләйлә Фазлыева: «Чикләүләрне йомшарту киләсе атнадагы эпидемиологик вәзгыятькә бәйле булачак»

Татарстанда 400-дән артык җәмәгать туклануы йортын тикшергәннәр – 10% бәйрәм көннәрендә ковид белән бәйле чикләүләрне үтәмәгән.

Фото: Денис Гордийко

(Казан шәһәре KZN.RU, 11-нче гыйнвар, Алинә Бережная). Яңа ел бәйрәмнәре чорында Татарстанда җәмәгать туклануы биналарын ковид белән бәйле чикләүләрне үтәү буенча тикшерүләр туктатылмады. Гомумән алганда, ревизорлар 400-дән артык бинада булган, аларның 10%-ы хокук бозулар белән эшләгән. Бу хакта бүген ТР Министрлар Кабинетында узган брифингта ТР Премьер-министры урынбасары Ләйлә Фазлыева хәбәр итте.

«Коронавирус белән авыручылар санының кимүе бар. Әмма без янә битлек режимын бозуларны теркибез, термометрия үткәрелми, кешеләр күпләп җыела торган урыннарда QR-кодларны тикшермиләр», – дип билгеләде Ләйлә Фазлыева.

Исегезгә төшерәбез, Татарстанда коронавируска бәйле чикләүләрне йомшарту бәйрәм чорына гына кертелде. Аерым алганда, 31-нче декабрьдән 1-нче гыйнварга каршы төндә җәмәгать туклануына 3:00 сәгатькә кадәр эшләргә рөхсәт ителде, 20-нче декабрьдән 10-нчы гыйнварга кадәр кафе һәм рестораннар 1:00 сәгатькә кадәр эшли алды. «Йомшартулар киләсе атнадагы эпидемиологик вәзгыятькә бәйле булачак», – дип ассызыклады Ләйлә Фазлыева.

Шулай ук укыгыз

Барлык яңалыклар