Җәй көне Салават Күпере паркында һәм Зәңгәр күлләр территориясендә беренче тапкыр кафе эшләячәк

Казанда җәмәгать киңлекләрендә сәүдә объектларын урнаштыру өчен барлыгы 15 аукцион үткәреләчәк.

Фото: Денис Гордийко

(Казан шәһәре KZN.RU, 3 нче апрель, Юлия Летникова). Бу җәйдә Салават Күпере паркында һәм Зәңгәр күлләр территориясендә кафе эшләячәк. Аларны урнаштыру хокукын Парклар һәм скверлар дирекциясе аукционда беренче тапкыр уйната. Барлыгы 15 нокта сатуга куелган, чөнки объектларның күп өлеше 2021 елда берьюлы 3 сезонга уйнатылган. Бу хакта Башкарма комитеттагы аппарат киңәшмәсендә Парклар һәм скверлар дирекциясе җитәкчесе Айгөл Латыйпова хәбәр итте.

«Аукционнарда без яңа форматларга зур кызыксыну күрәбез – азык-төлек, вендинг автоматлары һәм классик кафелар. Халыктан һәм бизнестан шундый сорау булса, без бик шат», – диде Казан Башкарма комитеты җитәкчесе Рөстәм Гафаров. «Беренче тапкыр стационар булмаган сәүдә объектлары Салават Күпере паркында һәм Зәңгәр күлләрдә – күп санлы халыкны җәлеп итү нокталарында барлыкка киләчәк», - дип өстәде ул.

А.Латыйпова сүзләренчә, аукционнарда фудтраклар зур ихтыяҗ казанган һәр лотка 5-7 эшмәкәр дәгъва иткән. Әйтик, «Казан» гаилә үзәге территориясендә 3 фудтрак барлыкка киләчәк.

Аккош күлендә традицион рәвештә вейк-парк эшләячәк. Ул монда 2020 елдан бирле һәм шәһәр халкы арасында зур популярлык белән файдалана.

Җәйге сезонга кошлар өчен азык белән вендинглар урнаштыру өчен аукционнар үткәрелгән. Алар Җиңү паркында, «Крылья Советов», Горький исемендәге паркларда һәм Комсомол күлендә барлыкка киләчәк.

7 нче апрельгә кадәр эшмәкәрләр «Крылья Советов» паркында һәм «Фестивальный» бульварында салкын эчемлекләр белән нокталар урнаштыру хокукына аукционнарда катнашу өчен гариза бирә алалар. «Быел дирекция объектларның эскиз проектларын территорияләр стилистикасына туры китереп эшләде», - дип билгеләп үтте А.Латыйпова.

Спорт товарлары белән объектлар Салават Күпере паркында һәм «Дубрава» урман паркының керү төркеме территориясендә барлыкка киләчәк. Объектларны дирекция бирәчәк, ә эшмәкәрләргә аларны эш өчен җиһазлар белән тәэмин итәргә кирәк булачак.

Кафе җәй көне Фучик урамындагы бульварда һәм Салават Күпере паркында эшләячәк, шулай ук якын арада Зәңгәр күлләрдә гомуми туклану ноктасын урнаштыру өчен аукцион ачылачак. Бина инде әзер, эшмәкәргә техник бирем шартларын үтәргә һәм павильонны территория концепциясенә туры китереп бизәргә кирәк. Барлык процедураларны да sale.zakazrf.ru мәйданчыгында күзәтеп була.

Парклар һәм скверлар дирекциясе җитәкчесе искәрткәнчә, паркларда сәүдә үсеше турында «Ачык ишекләр феврале» чараларының бер очрашуында фикер алышканнар. Традицион вакыйга яңа форматта узды: 70 тән артык эшмәкәр төркемнәрдә эшләгән һәм җәмәгать киңлекләрендә бизнесны яхшырту идеяләрен тәкъдим иткән. Мәсәлән, катнашучылардан сәүдә нокталарының тышкы кыяфәтенә техник биремне җентекләп ясау соравы килгән. «Без моны электрон документация формалаштырганда исәпкә алдык», – дип уртаклашты А.Латыйпова.

Исегезгә төшерәбез, «Ачык ишекләр феврале» очрашулары сериясе кысаларында барлыгы 4 чара узды, аларда 200 гә якын шәһәр кешесе катнашты. Аларның инициативасы белән җәй көне Казанда Yaratam chees бергәлегеннән шахмат клубының ачык очрашулары, Timerman белән берлектә йөгерү тренировкалары һәм Яшьләр дипломатиясе академиясеннән тотрыклы үсеш темасына лекцияләр форматында пикниклар узачак.

Фото: Марат Мөгыйнов