Җәй көне Казанның 57 нче мәктәбендә капиталь ремонт ясалды

Эшчеләр фасад һәм коммуналь челтәрләрне яңарттылар, кабинетларда җиһазлар һәм заманча җайланмалар урнаштырдылар

Казанның Киров районы Залесный бистәсендә 57 нче мәктәпкә капиталь ремонт ясалды. Бина 1966 елда төзелгәннән бирле яңартылмаган.

Җәй көне уку йортының фасады, коммуналь челтәрләр һәм җылыту системасы тулысынча ремонтланды. Эшләр шулай ук биналарга да кагылды: мәктәптә холлар, гардероб, спорт залы, чишенү бүлмәләре һәм актлар залы яңартылды.

Педагогларның уңайлылыгына да игътибар иттеләр, алар өчен уңайлы укытучылар бүлмәсе булдырдылар. Ә кечкенә укучылар өчен барлык башлангыч сыйныфларда яңа такталар, парталар һәм урындыклар урнаштырдылар.

Моннан тыш, мәктәпкә информатика, хезмәт, химия һәм физика дәресләре өчен заманча җиһазлар сатып алганнар, дип хәбәр иттеләр шәһәрнең Киров һәм Мәскәү районнары администрациясендә.

Исегезгә төшерәбез, быел Казанның алты мәктәбендә капиталь ремонт үткәрелде. Эшләр «Мәгарифне үстерү» федераль программасы буенча алып барылды. Мәктәпләрдә инженерлык челтәрләре алыштырылды, кабинетлар, шулай ук фасадлар һәм керү төркемнәре ремонтланды. Мәгариф учреждениеләре өчен кирәкле җайланмалар, җиһазлар һәм инвентарь сатып алганнар. Шулай ук шәһәрнең дүрт мәктәбендә сәламәтлек мөмкинлекләре чикләнгән балалар өчен махсус кабинетлар барлыкка килде.

Агымдагы ремонт 32 мәгариф оешмасында җәелдерелгән. Эшләр барышында түбәләр, фасадлар, цоколь бүлмәләре яңартылды, шулай ук тәрәзә блоклары алыштырылды, бу – учреждениеләрдә температура режимын яхшыртырга һәм энергияне сак тотуны арттырырга мөмкинлек бирде.

Шулай ук укыгыз

Барлык яңалыклар