Җәен Казан сулыкларында 13 кеше, шул исәптән бала батып үлгән

Республикада суда сапбордлар һәм кабартылган матраслар кулланганда булган вакыйгалар теркәлә

Фото: Денис Гордийко

(Казан шәһәре KZN.RU, 7 нче сентябрь, Юлия Летникова). Су коену сезонында Татарстан сулыкларында 63 вакыйга теркәлгән – 53 кеше, шул исәптән алты бала һәлак булган. 31 кеше коткарылган, шуларның 11 е – балалар. Бу хакта «Татар-Информ»да узган матбугат конференциясендә билгеле булды.

Казанда җәй дәвамында 13 кеше батып үлгән, аларның берсе – бала. Ел башыннан республикада суда 89 вакыйга теркәлгән, аларда 66 кеше, шул исәптән сигез бала һәлак булган. Татарстанда яшәүче 65 кешене коткара алганнар, шуларның 12 се – балалар, дип хәбәр итте Россия Гадәттән тыш хәлләр министрлыгының ТР буенча Баш идарәсенең су объектларында кешеләр иминлеге бүлеге башлыгы Регина Гаязова.

Республика сулыкларындагы җиһазландырылмаган урыннарда 42 кеше, шул исәптән сигез бала батып үлгән. Тагын алты өлкән кешене һәм ике баланы коткара алганнар.

«Суга егылып төшү аркасында 18 кеше һәлак булган. Аларның икесе сапбордта коткару жилетыннан башка йөзгән», – дип билгеләп үтте спикер. Шулай ук быел кабартылган матраслар кулланганда куркынычсызлык чараларын үтәмәү белән бәйле биш вакыйга теркәлгән. Шул сәбәптән бер бала һәлак була, 11 кеше, дүрт бала коткарыла.

Ата-аналар тарафыннан җитәрлек контроль булмау һәм йөзә белмәү аркасында да вакыйгалар булган, сигез бала һәлак булган, 12 се коткарылган.

Шулай ук укыгыз

Барлык яңалыклар