Лекцияләр, мастер-класслар һәм кичә: «УРАМ» экстрим-паркында «ШӘП» блогерлар фестивале узачак

Экспертлар социаль челтәрләр белән эшләү тенденцияләре турында сөйләячәк

Фото: Денис Гордийко

(Казан шәһәре KZN.RU, 13 нче декабрь). «УРАМ» экстрим-паркында 15 нче декабрьдә Татарстанның «ШӘП» блогерлар фестивале узачак. Программада дискуссияләр, мастер-класслар, кичә һәм музыкаль чыгышлар бар.

Фестиваль 11:00 сәгатьтә ачылачак. Социаль челтәрләрдә милләтара тематиканы трендлар көн тәртибенә яраклаштыру үзенчәлекләре турындагы семинар чараларның берсе булачак. Спикер булып «Диалог регионы» коммерцияле булмаган автоном оешмасының дәүләт һәм муниципаль хезмәткәрләренең шәхси аккаунтларын үстерү юнәлеше җитәкчесе урынбасары Екатерина Набатникова чыгыш ясаячак. Шул ук блокта блогерлар Илнар Идрисов, Олеся Дмитриева һәм Ксения Романова катнашачак.

13:00 сәгатькә Татарстанның дәүләт телләрен интернетта популярлаштыру буенча республика конкурсында җиңүчеләрне бүләкләү тантанасы планлаштырылган. Анда ТР Премьер-министры урынбасары Ләйлә Фазлыева, ТР яшьләр эшләре министры Ринат Садыйков, «Алдынгылар хәрәкәте»нең төбәк бүлеге җитәкчесе Тимур Сөләйманов һәм башкалар катнашачак.

Мәйданчыкта шулай ук блогерлардан, продюсерлардан һәм Татарстан медиаүзәкләре вәкилләреннән лекцияләр һәм воркшоплар булачак. Спикерлар бу өлкәдәге тенденцияләр турында сөйләячәк һәм үз тәҗрибәләре белән уртаклашачак. Мәсәлән, 14:00 сәгатьтә блогта юмор турында Дамир Илгамыч сөйләячәк, ә 15:00 сәгатьтә тыңлаучылар Эльвина Рәхмәтуллинадан блогерлык юлын ничек башларга икәнен беләчәк.

Фестиваль кичә белән ябылачак. Сәхнәгә җирле артистлар чыгачак, алар арасында Дышать һәм LOVEMEMORE бар.

Катнашу бушлай, ләкин алдан теркәлү узарга кирәк. Оештыручылар хәбәр иткәнчә, тулырак программа белән сылтама буенча танышырга мөмкин.

Шулай ук укыгыз

Барлык яңалыклар