Җиңел атлетика эстафетасы 22 апрельдә Казанда җәйге спорт сезонын ачачак

Ярышлар кешенең беренче галәмгә очуына 60 ел тулуга багышлана.

Фото: Казан шәһәре KZN.RU

(Казан шәһәре KZN.RU, 22-нче март, Алина Бережная). Казанда җәйге спорт сезонына әзерлек башланды. Беренче чара – җиңел атлетика эстафетасы – 22-нче апрельгә планлаштырылган. Аннары Татарстан башкаласында Казан марафоны һәм триатлон буенча ачык шәһәр чемпионаты узачак. Бу хакта бүген шәһәр Башкарма комитетының эшлекле дүшәмбесендә Физик культура һәм спорт комитеты рәисе Альберт Салихов сөйләде.

Бер айдан соң узачак җиңел атлетика эстафетасы кешенең беренче галәмгә очуына 60 ел тулуга багышлана. Быел даими катнашучыларның күпсанлы үтенечләре буенча эстафета маршруты Казан Кремле территориясе аша узачак. «Шул рәвешле эстафета үзенең башлангыч маршруты буенча үткәреләчәк», – диде Альберт Салихов.

2-нче майда Казан марафоны – шәһәрнең төп истәлекле урыннары буенча йөгерү экскурсиясе узачак. Альберт Салихов марафон узган көннәрдә, 1-нче һәм 2-нче майда юлларда хәрәкәтне вакытлыча чикләү кертеләчәк, дип билгеләп үтте.

Җәй башында триатлон буенча Казанның ачык чемпионаты узачак.

Быел ГТО нормативларын TIMERMAN оешмасы эгидасы астында барлык ярышларны уздыру мәйданчыкларында да тапшырырга мөмкин булачак. Экспо-зонада барлык чараларда да комплекс нормативларын үтәү өчен универсаль мәйданчык урнашачак.

Искәртеп узабыз, тәмамланган кышкы спорт сезонында Казанда 50-дән артык турнир узды.