Дәвалау күнегүләре һәм цигун гимнастикасы: Казанда «Йорт янында спорт» проектының кышкы күнекмәләре дәвам итә

Чараларда катнашу өчен алдан теркәлергә кирәк

Денис Гордийко фотосы

9–15 март көннәрендә Казанда «Йорт янында спорт» проекты кысаларында бушлай кышкы күнекмәләр оештырыла. Шәһәрлеләр өчен чаңгыда һәм тимераякта шуу остаханәләре, көч һәм функциональ күнекмәләр, дәвалау күнегүләре үткәрелә.

Әйтик, бүген казанлыларны Горки-Әмәт урманына чаңгыда шуарга чакыралар. Теләге булган шәһәр халкы күнекмәгә 18:30 сәгатьтә кушыла ала.

Иртәгә, 11 мартта, «Калейдоскоп» паркы шугалагында тимераякта шуу дәресе үткәрелә. Чара 18:00 сәгатьтә башлана. Шул ук көнне 20:00 сәгатьтә «Салават күпере» торак комплексында теләге булган шәһәр халкы көч кулланып ясала торган күнекмәләрдә катнаша ала.

Пәнҗешәмбе көнне, 12 мартта, казанлыларга берьюлы берничә спорт чарасы тәкъдим ителә. 8:00 сәгатьтә «Үзәк» стадион манежында функциональ күнекмә үткәреләчәк. 9:00 сәгатьтә Урицкий паркында шәһәрлеләр Скандинавия йөреше белән шөгыльләнә ала. 10:00 сәгатьтә Рихард Зорге урамында урнашкан 24 нче йорт ишегалдында цигун гимнастикасы уздырыла. 18:30 сәгатьтә халык Горки-Әмәт урманында чаңгыда шуу дәресендә катнаша ала.

Скандинавия йөреше белән шөгыльләнүче шәһәр халкын җомга көнне, 13 мартта, 9:00 сәгатьтә Горький исемендәге паркта һәм Наратлыкта көтәләр. Соңрак, 14:00 сәгатьтә, теләге булганнар тимераякта шуу остаханәсенә кушыла ала. Дәрес «Ракета» спорт комплексы шугалагында үткәрелә.

Шимбә көнне, 14 мартта, «Үзәк» стадион манежында төз гәүдә торышы өчен күнегүләрдән торган күнекмә оештырыла. Чара сәгать 8:00 дә башлана. Соңрак, 8:45 сәгатьтә, Горький исемендәге паркта «кофе-ран» форматында йөгерү чарасы үткәрелә. 10:00 сәгатьтә казанлылар өчен «Калейдоскоп» паркы шугалагында тимераякта шуу остаханәсе әзерләнә. 12:00 сәгатьтә «Комсомолец» паркында дәвалау күнегүләре тәкъдим ителә. 14:00 сәгатьтә шәһәр халкы Горки-Әмәт урманында чаңгыда шуу дәресенә кушыла ала.

Якшәмбе көнне, 15 мартта, «Яз» торак комплексында дәвалау физкультурасы уздырыла. Чара 10:00 сәгатьтә башлана. Цигун гимнастикасы атнаның соңгы спорт чарасы булачак. Дәрес Кабан күле буенда 12:00 сәгатьтә үткәрелә.

Физик тәрбия һәм спорт комитеты хәбәр иткәнчә, расписаниедә үзгәрешләр булырга мөмкин. «Йорт янында спорт» телеграм-каналында үткәреләсе чаралар хакында тулырак мәгълүмат алырга һәм үзең теләгән күнекмәләргә язылырга була.

Шулай ук укыгыз

Барлык яңалыклар