Яңалыклар
11.12.2023, 15:01
2024 елда Шәһәрнең үсеш институты кураторы Рубен Аракелян булачак
Татарстан Республикасы башкаласында «Казаныш» халыкара архитектура-төзелеш форумына йомгак ясалды
Фото: Денис Гордийко
(Казан шәһәре KZN.RU, 11 нче декабрь, Диләрә Гафурова). 2024 елда Шәһәрнең үсеш институты кураторы WALL архбюросы оештыручысы Рубен Аракелян булачак. Шәһәр проектлары буенча уртак эш һәм һөнәри тәҗрибә алмашу планлаштырыла. Мәскәү эксперты катнашында яшь Казан архитекторлары өчен консультацияләр, мастер-класслар һәм башка чаралар үткәрәчәкләр. Бу хакта бүген эшлекле дүшәмбедә Казан Мэры Илсур Метшин хәбәр итте.
«Казаныш» форумында Илсөяр Мисхатовнадан (Казанның баш архитекторы – ред. искәрмәсе) иҗтимагый башлангычларда эшләячәк тагын бер баш архитекторны җәлеп итү турында тәкъдим килде. Рубен Аракелян – яңа Россия киңлегендә үсә торган талантлы архитекторларның берсе. Ул тәкъдимне кабул итте һәм киләсе елга Казанның иҗтимагый башлангычларда баш архитекторы булачак», - дип хәбәр итте шәһәр башлыгы.
Казанда 5-7 нче декабрьдә узган «Казаныш» халыкара архитектура-төзелеш форумында Рубен Аракелян бертуган Крестовниковларның элеккеге заводы бинасын реновацияләү концепциясен тәкъдим итте. Мәскәү архитекторы шулай ук шәһәр өчен мөһим булган территорияләрдә берничә зур проектны җитәкли. «Без илһамландык һәм Казанның иҗтимагый, эшлекле һәм мәдәни тормышының үзәгенә әвереләчәк яңартылган бина проектының эскизларын күрәбез», – дип билгеләп үтте башкала Мэры.
«Казаныш» форумы нәтиҗәләре турында Шәһәрне үстерү институты директоры Алексей Горбунов сөйләде. Өч көн эчендә Камал исемендәге театрда 5 меңнән артык кеше булды, алар арасында 250 спикер, дөньяның 13 иленнән 80 нән артык чит ил вәкиле, шул исәптән БРИКС әгъзалары бар. Форумга Әнкара һәм Тәбриз мэрлары, Тәһран, Циндао, Харбин, Чэнду, Сиане, Минск, Мәскәүнең баш архитекторлары килде.
Илсур Метшин ассызыклаганча, Казан форумны үткәрү һәм анда тәкъдим ителгән проектлар буенча уңай бәяләмәләр алуын дәвам итә.
«Казаныш»та бик кызыклы эшләр тәкъдим ителде. Алар арасында Кабан күлендә фонтаннар төзү концепциясе дә бар, ул безне шаккатырды һәм бу проектны тормышка ашыруга илһамландырды. Мәскәүнең баш архитекторы Сергей Кузнецовка форумга һәм Кабан күле концепциясе проектына югары бәя биргәне өчен рәхмәт», - дип рәхмәт белдерде Мәскәүнең баш архитекторына Илсур Метшин. Исегезгә төшерәбез, проектны Bespoke Architects архитектура бюросы һәм ES gallery арт-галереясе җитәкчесе Элина Сәфәрова тәкъдим итте.
Форумның беренче көнендә Илсур Метшин БРИКС илләре архитекторлары берләшмәсен булдыру инициативасы белән чыкты, бу төрле илләр белгечләре арасында төзелеш өлкәсендә белем һәм технологияләр алмашуны яхшыртырга, киләчәк белгечләр сыйфатлырак профильле белем алсын өчен әйдәп баручы архитектура мәктәпләрендә стажировкалар башларга мөмкинлек бирәчәк.
«Билгеләп үтәм, КДАТУның Харбин политехник университеты (Кытай) каршындагы архитектура-төзелеш-тикшеренү институты белән хезмәттәшлегенә старт бирелде инде. Хезмәттәшлекне җайга салуга беренче адым ясалды», - дип хәбәр итте Алексей Горбунов.
Форумда якын киләчәктә Казанда гамәлгә ашыру планлаштырыла торган берничә проект та тәкъдим ителде. Алар арасында шәһәрдә елга сервисын үстерү буенча «Казан судагы шәһәр» концепциясе, «Мәктәпкә юл» проекты бар.
«Юлны дөрес юнәлешне сайлап һәм иң яхшы тәҗрибәләрне өйрәнеп башлау мөһим. Моннан тыш, «Мәктәпкә юл» проекты буенча без район администрацияләре башлыклары белән килештек, киләсе елга һәркем бер проектны тормышка ашырачак. Әгәр теләүчеләр күбрәк булса, без аны тормышка ашырырга тырышачакбыз. Бу архитекторлар коллаборациясе генә түгел, анда балалар да катнаша алачак. Балалар архитектура кыяфәтенә битараф булмаган кешеләр булып үсәчәк», – дип белдерде Илсур Метшин.
Форум һәм анда уздырылган «Милли үзенчәлекне чагылдыру» күргәзмәсе нәтиҗәләре буенча Казанда чит шәһәр һәм чит ил архитекторлары эше өчен үзенчәлекле ярдәмче булачак каталог төзеләчәк.
«Күргәзмә бөтен кешегә дә тәэсир итте. Татар мәдәниятен, милли колоритын саклауның һәм аны архитектурада куллануның ачык мисалы», – дип билгеләп үтте Мэр. Ул Башкарма комитет җитәкчесе урынбасары Гүзәл Сәгыйтовага Шәһәрне үстерү институты белән берлектә әлеге күргәзмәне кайда үткәрергә мөмкин икәнлеге турында уйларга кушты.
Илсур Метшин архитектура һәм шәһәр төзелеше идарәсенә, Казанның шәһәр үсеше институты һәм баш архитекторы Илсөяр Төхвәтуллинага «Казаныш» форумын уздырган өчен, ә шәһәр башлыгының беренче урынбасары Денис Калинкинга чарага девелоперлар һәм төзүчеләрне җәлеп иткән өчен рәхмәт белдерде.
Фото: Денис Гордийко, Марат Мөгыйнов
Фоторепортаж
Эшлекле дүшәмбе 11.12.2023
Видеорепортаж
11.12.2023
12:22
«Казаныш» форумында 5 меңнән артык кеше катнашкан
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
