Казанда журналист һәм «Все как у зверей» блогын төзүче Евгения Тимонова ачык лекция белән чыгыш ясаячак

Спикер рекламачыларның кешеләрнең фикерләре белән ничек идарә итүләре турында сөйләячәк.

Фото: Марат Мөгыйнов

(Казан шәһәре, KZN.RU, 6 нчы апрель). 9 нчы апрельдә Бәшир Рәмиев исемендәге IT-паркта «Все как у зверей» популяр видеоблогы авторы һәм алып баручы, натуралист, биолог һәм язучы Евгения Тимонова «Купи слона!» ачык лекциясендә реклама турында биология күзлегеннән сөйләячәк.

Спикер рекламачыларның кешеләрнең фикерләрен ничек манипуляцияләүләре һәм сәер эшләр башкарырга мәҗбүр итүләре турында күзәтүләр белән уртаклашачак, шулай ук нәтиҗәле рекламаның эволюция буенча тикшерелгән ысулларын караячак һәм аларга ничек каршы торырга кирәклеген аңлатачак.

Е.Тимонова 2013 елда кеше тәртибенең биологик сәбәпләре турында «Все как у зверей» дигән фәнни-популяр видеоканал булдырган. Программада кешеләр һәм хайваннар тотышының көтелмәгән охшашлыклары ачыклана. Миллионлаган тамашачы караган иң популяр тапшырулар түбәндәге сорауларга җавап бирә: «Нигә без ялангач?», «Прокрастинация механизмнары нинди?», «Ни өчен безне тишекләр куркыта һәм бетчәләр гипнозлый?», «Мәхәббәт каян килгән?», «Хатын-кызлар нәрсә тели?», «Нигә сез, әбиләр?», «Картаергамы яки картаймаскамы?» һ.б.

Лекция 17:00 сәгатьтә Спартак ур., 2 адресы буенча башлана (конференцияләр залы, 2 кат). Алдан теркәлү буенча керү ирекле, дип хәбәр итә ТР Цифрлар министрлыгының матбугат хезмәте.

Шулай ук укыгыз

Барлык яңалыклар