Казанда «Урам» экстрим-паркының ябык комплексында Рөстәм Миңнеханов һәм Илсур Метшин булды

Урам мәдәниятенең яңа үзәге Казансу елгасы ярында урнашкан.

Фото: president.tatarstan.ru

(Казан шәһәре KZN.RU, 30-нчы август). Бүген ТР Президенты Рөстәм Миңнеханов, ТР Дәүләт Киңәшчесе Минтимер Шәймиев, Казан Мэры Илсур Метшин, РФ Төзелеш һәм торак-коммуналь хуҗалык министры урынбасары Никита Стасишин һәм ТР яшьләр эшләре министры Дамир Фәттахов «Урам» ябык экстрим-паркында булдылар.

Исегезгә төшерәбез, «Урам» экстрим-паркының беренче чираты 2020 елның җәендә Казансу елгасының яр буе территориясен үстерү стратегиясе кысаларында ачылды. Ачык һавада урнашкан җәмәгать киңлеге стритбол мәйданчыгын, паркур һәм воркаут өчен мәйданчыкларны, ике памп-трек һәм скейт-паркны, шулай ук йөрү урыннарын берләштерә, биредә даими рәвештә халыкара һәм федераль дәрәҗәдәге ярышлар уздырыла. Урам мәдәниятенең яңа үзәген – «Урам» ябык экстрим-паркы комплексын булдыру – экстримны яратучыларга ел буе күнегүләр ясарга мөмкинлек бирәчәк.

Күчмә киңәшмәдә катнашучылар яңа комплексның җиһазланышын бәяләде. Ике катта экстрим-зоналар: эйр-парк, стрит-плаза, бетон боул һәм скейт-йорт урнашкан. Моннан тыш, биредә заманча музыка үзәге, диджеинг мәктәбе, скейт-шоп, бию залы, галерея, лекторий, кафе, ял итү зонасы урнашкан.

Экскурсия барышында республика башлыгына спорт инфраструктурасының мәйданчыкларын җыю һәм сыйфаты буенча «Урам» ябык экстрим-паркы дөнья күләмендә уникаль булып тора дип сөйләделәр. Проектлаучылар спортчыларның яңа буынын тәрбияләү өчен кирәкле барлык экстрим-зоналарны булдырды.

Ябык комплекс буйлап экскурсиядән соң кунаклар экстрим-паркның урам киңлеген карады һәм килүчеләр белән аралашты, дип хәбәр итә ТР Президенты матбугат хезмәте.

Фоторепортаж

Видеорепортаж