КФУның астрономия обсерваторияләре комплексы ЮНЕСКО Бөтендөнья мирасы исемлегенә кертелүгә дәгъва итә

Уңыш очрагында бу Казан галимнәренә халыкара грантлар алырга, ә университетка – брендны үстерергә һәм туристларны җәлеп итәргә мөмкинлек бирәчәк.

Фото: Казан шәһәре KZN.RU

(Казан шәһәре KZN.RU, 9-нчы апрель, Екатерина Виславская). Казан федераль университетының астрономия обсерваторияләре комплексы ЮНЕСКО бөтендөнья мирасы исемлегенә кертелүне дәгъвалый.

Ике обсерваторияне – шәһәрнең читендәге һәм университетның төп бинасы ишегалдында урнашкан – көтү исемлегенә кертү турында карар узган ел кабул ителгән иде, ә хәзер бер төркем белгечләр номинация өчен кирәкле документлар пакетын әзерләү өстендә эшли. Сентябрь ахырында алар комплектлыкны тикшерү өчен Бөтендөнья мирас үзәгенә тапшырылачак, ә 2022 елның февраленә ЮНЕСКОга документларның йомгаклау пакеты киләчәк.

КФУның Халыкара мөнәсәбәтләр институты директоры Рамил Хәйретдинов билгеләп үткәнчә, ЮНЕСКО Бөтендөнья мирасы исемлегенә кертелүгә әзерлек – озак һәм бик четерекле процесс. «Бу – барлык мәсьәләләр дә карала торган документларның бик зур томы, анда обсерваторияләрнең тарихы гына түгел, ә фәнни нигезләү, методик аспектлар, техник, мораль-этик, идарә итү, оештыру мәсьәләләре дә карала. Документлар җыю бик җитди, зур», – дип сөйләде ул бүген «Татар-информ» мәгълүмат агентлыгында узган матбугат конференциясендә.

Бөтендөнья мирасы исемлегенә обсерватория комплексын кертү – имидж вакыйгасы гына түгел. КФУның белем бирү эшчәнлеге буенча проректоры, КФУның Физика институты директоры Дмитрий Таюрский билгеләп үткәнчә, бу астрономия обсерваторияләренең дөнья челтәрен булдырырга һәм аларга ярдәм итәргә мөмкинлек бирәчәк, чөнки бөтен дөнья буенча мондый учреждениеләр яшәү өчен көрәш хәлендә.

Россия ИКОМОС милли комитеты вице-президенты, КФУның фәнни эшчәнлек буенча халыкара мөнәсәбәтләр институты директоры урынбасары Рафаэль Вәлиев, үз чиратында, уңышка ирешкән очракта, Казан галимнәре халыкара грантлар алуга конкурсларда катнаша алачак, дип саный. Яңа статус шулай ук университет брендының танылуын арттырырга, обсерватория территориясендә туризмны үстерүгә этәргеч бирергә мөмкинлек бирәчәк, шул исәптән фәнни – моның белән 15 меңнән артык турфирма кызыксына. Мисал сыйфатында ул «Казан Кремле» музей-тыюлыгын китерде, анда совет чорында елына 700 мең – 1 млн турист кабул иткән, ә бөтендөнья мирасы исемлегенә кертелгәннән соң туристлар агымын өч тапкырга арттыра алган.

«Хәзер ЮНЕСКО Бөтендөнья мәдәни һәм табигый мирасы исемлегендә 1100-дән артык объект исәпләнә. Хәзерге вакытта Россия Федерациясе объектлар саны буенча 9-нчы урында тора. 30 объектның 10%-ы Татарстанда булуын күз алдына китерсәк, бу, гомумән алганда, безнең өчен бик мөһим», – дип йомгаклады Рафаэль Вәлиев.

Шулай ук укыгыз

Барлык яңалыклар