Казанның 121 нче номерлы лицее командасы «Куркынычсызлык тәгәрмәче» бөтенроссия конкурсында Татарстан данын яклаячак

Укучылар республика этабында беренче урынны яуладылар һәм бөтенроссия этабында чыгыш ясау мөмкинлегенә ия булдылар.

Фото: Денис Гордийко

(Казан шәһәре KZN.RU, 30 нчы май, Юлия Летникова). Казан шәһәре Совет районының 121 нче номерлы лицее командасы «Куркынычсызлык тәгәрмәче» яшь инспекторлар хәрәкәте конкурсында шәһәр һәм республика данын яклаячак. Укучылар республика этабында беренче урынны яуладылар, шуның белән конкурсның бөтенроссия дәрәҗәсендә чыгыш ясау мөмкинлеге алдылар, дип хәбәр итте Казан Башкарма комитетында узган эшлекле дүшәмбе вакытында Мәгариф идарәсе башлыгы Ирек Ризванов.

Аның сүзләренә караганда, Казан мәктәпләре укучылары төрле конкурсларда һәм ярышларда яхшы нәтиҗәләр күрсәтәләр. Әйтик, бу елның кышында Казанның Идел буе районы 83 нче номерлы лицей хатын-кызлар командасы «КЭС-Баскет» мәктәп баскетбол лигасы чемпионатының республика финалында беренче урынны яулады.

Моннан тыш, май аенда Казанда «Озын тәнәфес» шәһәр конкурсы тәмамланды. Конкурсның финалына чыгу өчен 49 учреждение һәм 4 меңнән артык мәктәп укучысы көч сынашты. Беренче урын һәм 1 млн сумлык сертификат Казанның Яңа Савин районының 170 нче номерлы мәктәбенә бирелде.

Мәдәни һәм спорт чараларыннан тыш, Казанда даими рәвештә белем бирү проектлары да уза. Шундыйларның берсе – «Балалар бакчаларында татар телен укытуның заманча, нәтиҗәле алымнары» дигән семинарлар циклы – быел да дәвам итте. Аларда барлыгы 800 укытучы һәм 1,4 мең тәрбияче катнашты. «Без семинарларны яңа форматта үткәрергә тырыштык, ә спикерлар сыйфатында алдынгы һәм тәҗрибәле татар теле укытучыларын, башка фәннәр буенча педагогларны һәм үз эшләрендә кызыклы методикалар кулланучы чит ил коллегаларыбызны чакырдык», - дип билгеләп үтте Мәгариф идарәсе башлыгы.