Кытайның Гуанчжоу шәһәре Казан волонтерларына 50 мең битлек тапшырды

Бу Кытай шәһәрләре үз тугандаш шәһәрләренә җибәргән иң зур партия.

Фото: Денис Гордийко

(Казан шәһәре KZN.RU, 20-нче ноябрь, Алена Мирошниченко). Бүген Казанда Кытай Халык Республикасының Генераль консуллыгы территориясендә Татарстан башкаласына Гуанчжоу шәһәреннән битлекләр һәм термометрлар тапшыру тантанасы узды. Казанга 50 мең битлек һәм 100 термометр китергәннәр, бу Кытай шәһәрләре тугандаш шәһәрләренә җибәргән иң эре партия.

Чарада Кытай Халык Республикасының Казандагы Генераль консулы У Инцинь, Халыкара һәм муниципальара элемтәләр идарәсе башлыгы Руслан Галиәхмәтов, Балалар һәм яшьләр эшләре комитеты рәисе урынбасары Марат Уразаев, Мәгариф идарәсе башлыгы урынбасары Марат Фәттиев һәм шәһәрнең үзиреклеләр хәрәкәте вәкилләре катнашты.

«Көн саен ике як өчен дә файдалы хезмәттәшлек һәм Кытай партнерларыбыз белән уртак үсештә ышаныч ныгый бара. Бүгенге вакыйга - моның ачык дәлиле, - дип билгеләп үтте Руслан Галиәхмәтов. - Авыручылар саны, кызганычка каршы, югары булган шартларда бу бүләк COVID-19 белән көрәшкә саллы өлеш, шулай ук Казан белән Гуанчжоу арасындагы дуслыкны һәм үзара хөрмәтне раслау күренеше булып торачак.

Шулай итеп, Гуанчжоудан алынган битлекләр «Без бергә» үзара ярдәм штабы волонтерлары өчен Балалар һәм яшьләр эшләре комитетына тапшырылды, ул үз эшен октябрьдә яңадан башлады. Үзиреклеләр мөрәҗәгать итүчеләрнең гаризалары буенча 60 яшьтән өлкәнрәк ялгыз яшәүче пенсионерларга, шулай ук үзизоляциядә яки авыр тормыш хәлендә калучыларга азык-төлек һәм дарулар китерә. Моннан тыш, волонтерлар өйдә дәваланучы авыруларга яңа коронавирус инфекциясеннән бушлай препаратлар китерә башлыйлар.

Термометрларны Казан Мәгариф идарәсенә җибәрделәр - шәһәр мәктәпләре һәм балалар бакчалары өчен. Термометрлар ярдәмендә белем бирү учреждениеләре хезмәткәрләренең һәм укучыларның температурасы көндәлек контрольдә тотылачак.

«Бу ярдәм ике шәһәр арасындагы чын дуслыкны күрсәтә. Без ул Казанда коронавируска каршы көрәштә үз ролен уйный алыр, дип өметләнәбез», - диде У Инцинь.

Исегезгә төшерәбез, Казан белән Гуанчжоу арасында тугандаш мөнәсәбәтләр урнаштыру турындагы килешү 8 ел элек имзаланган иде. Шуннан бирле күп кенә уртак чаралар оештырылды. Әйтик, 2018 елда Казан беренче тапкыр Гуанчжоу шәһәр инновацияләренең IV Халыкара премиясе - уңышлы тәҗрибәләр алмашу өчен шәһәрләр һәм төбәкләрнең тотрыклылыгын тәэмин итүдә абруйлы дөнья мәйданчыгы - финалистлары исәбенә керде.