QR-коды булган 60 яшьтән өлкәнрәк казанлылар транспорт картасыннан файдалана алачак

Прививка ясатмаган өлкән яшьтәге шәһәрлеләрнең транспорт карталары вакытлыча ябылачак, әмма мондыйлар азчылыкны тәшкил итә.

Фото: Денис Гордийко

(Казан шәһәре KZN.RU 20-нче ноябрь). 22-нче ноябрьдән Татарстанда эпидемиологик вәзгыятьнең начараюы белән бәйле яңа чикләү чаралары кертелә. ТР Министрлар Кабинетының 17-нче ноябрьдән кабул ителгән 1100-нче номерлы карары нигезендә, дүшәмбедән 60 яшьтән өлкәнрәкләр өчен транспорт карталарының гамәлдә булуы туктатыла.

COVID-19-га каршы вакцинацияләнгәнне яки әлеге авыру белән авырганны раслый торган QR-коды булган 60 яшьтән өлкәнрәк затлар, шулай ук вакцинага каршы медицина күрсәтмәләре булуны раслый торган QR-коды булган затлар, ТР Министрлар Кабинеты карарында әйтелгәнчә, искәрмә булып тора.

Казанда транспорт карталары 60 яшьтән өлкәнрәк 261 мең кешегә бирелгән. Шулардан 26,8 меңе генә җәмәгать транспортыннан файдалана алмаячак, чөнки QR-кодлары юк, дип ачыклык керттеләр «Транспорт картасы» акционерлык җәмгыятендә. Калган 60 яшьтән өлкәнрәкләрнең тиешле прививкалары, медотводлары бар, яки алар болай да бер кая да чыгып йөрмәскә карар кылган, шуңа күрә ноябрь ае өчен карталарына акча салып тормаган.

Декабрь аена кертелгән акча ябылган транспорт картасында саклана. Алардан Татарстан Республикасы министрлар кабинетының эпидимиологик хәл яхшыру турындагы тиешле карарлары чыкканнан соң яки QR-код барлыкка килгәннән соң файдаланырга мөмкин булачак.

Исегезгә төшерәбез, дүшәмбедән Татарстан халкы җәмәгать транспортыннан QR-код күрсәткәндә генә файдалана алачак. Моннан тыш, автовокзалларда да вакцинацияләнгәнен яки соңгы 6 айда әлеге авыру белән авырганын яки медотводы булуны раслый торган докуменлары булмаганнарга билетлар сату тыелачак. Кертелгән чикләүләр турында тулырак мәгълүмат – KZN.RU порталында урнаштырылган белешмәлектә.

Шулай ук укыгыз

Барлык яңалыклар