Казанлылар Бах фестиваленең онлайн-концертын карый алачак

Концертның программасы тулысынча бөек композитор әсәрләреннән торачак.

(Казан шәһәре KZN.RU, 27-нче март). С.Сәйдәшев исемендәге дәүләт зур концертлар залындагы Бах фестивале онлайн форматка күчә. 27-нче мартта фестивальнең икенче концерты онлайн-трансляциядә узачак.

Концертның программасы тулысынча бөек композитор әсәрләреннән торачак. Концертта Казан консерваториясенең орган, клавесин һәм арфа кафедрасы укытучылары чыгыш ясаячак: Рубин Абдуллин, Елена Бурундуковская, Людмила Камелина, Вероника Лобарева, Илсөяр Сөләйманова, Карина Горбанова, Фәридә Нуруллоева.

Артистлар буш залда чыгыш ясаячак, тамашачылар музыкантларның чыгышларын онлайн режимда С.Сәйдәшев исемендәге концерт залы сайтында бушлай тыңлый алачак. Концерт 16.00 сәгатьтә башлана, дип хәбәр итә ТР Мәдәният министрлыгы матбугат хезмәте.

«Иоганн Себастьян Бах» халыкара фестивале традицион рәвештә март аенда уздырыла һәм дөньяда иң танылган композиторларның берсенең туган көненә багышлана. Быел музыка дөньясы барокко эпохасы остасы һәм гүзәл импровизатор тууына 335 ел тулуны билгеләп үтә, аның исеме музыкаль сәнгатьнең чын символы булып тора.

Исегезгә төшерәбез, фестиваль 9-нчы мартта С.Сәйдәшев исемендәге Дәүләт Зур концертлар залында соло органы өчен һәм оркестр озатуында язылган әсәрләрдән төзелгән тантаналы программа белән ачылды. Казанлылар алдында Россиянең халык артисты Рубин Абдуллин һәм Казан консерваториясенең Камера оркестры чыгыш ясады. Дирижерлык пульты артына немец дирижеры Лео Кремер басты, аның белән югары уку йортының иҗади коллективлары инде 30 елдан артык эшли. Икенче көнне, 10-нчы мартта, бу программа Россиянең төп концерт сәхнәләренең берсендә тәкъдим ителде - Мәскәү консерваториясенең органик абонементы кысаларында Мәскәүдә консерваториянең Зур залында.

Шулай ук укыгыз

Барлык яңалыклар