Казанлылар World Urban Parks бөтендөнья конгрессына махсус шаттлларда эләгә алачаклар

Иртәгә Казанда World Urban Parks бөтендөнья конгрессы старт ала.

(Казан шәһәре KZN.RU, 17-нче октябрь). Иртәгә, 18-нче октябрьдә, Казанда World Urban Parks бөтендөнья конгрессы старт ала. Ул «Казан Экспо» халыкара күргәзмә үзәгендә Австралия, Яңа Зеландия, Акш, Африка, Европа һәм БДБ илләреннән 120-дән артык спикер һәм меңнән артык делегатны – архитекторлар, урбанистлар, ландшафт дизайнерлары, шәһәр төзүчеләре һәм дәүләт хакимияте вәкилләрен җыячак.

Чарага алдан теркәлү узган һәр кеше керә ала. Моның өчен шәһәрдә махсус автобуслар эшләячәк. «Казан Экспо»га барып җитү һәм аннан шәһәргә кайту өчен, казанлылар шаттллар беркетелгән иң уңайлы локацияне сайлап алырга тиешләр: «Камал театры» һәм «Ривьера» аквапаркы» тукталышлары, шулай ук Профсоюз урамы буенча урнашкан «Ногай» кунакханәсе каршындагы тукталыш.

Камал театрыннан һәм «Ногай» кунакханәсеннән күргәзмә үзәгенә кадәр автобуслар 7.30, 7.45, 8.00, 8.15, 12.30 сәгатьтә кузгалып китәчәк , «Ривьера» аквапаркыннан – 7.45, 8.00, 8.15 сәгатьтә.

«Казан Экспо»дан «Камал театры» һәм «Ривьера» аквапаркы» тукталышына кадәр, шулай ук Профсоюз урамы буенча урнашкан «Ногай» кунакханәсенә кадәр шаттллар 18.45, 19.00, 19.15 сәгатьтә китәчәк, дип хәбәр итә park.tatar.

Конгресста катнашу өчен рәсми сайтта теркәлү узарга кирәк.

Шулай ук укыгыз

Барлык яңалыклар