Казанлылар ТР Милли музеена һәм аның филиалларына бушлай керә алачак

Акция 10 нчы гыйнварда узачак.

Фото: Денис Гордийко

(Казан шәһәре KZN.RU, 9 нчы гыйнвар). 10 нчы гыйнварда ТР Милли музеена һәм аның филиалларына керү бушлай булачак. Акция айның беренче сишәмбесендә үткәрелә, әмма мәдәният учреждениеләренең эш графигы үзгәрү сәбәпле, бушлай керү көнен 10 нчы гыйнварга күчерделәр.

Мәсәлән, Милли музейның үзендә казанлылар Петр I ассамблеялары тарихын сөйләүче стенд күргәзмәсен, ә Горький һәм Шаляпин музеенда СССРның халык артисты Николай Якушенконың тууына 125 ел тулуга багышланган экспозицияне күрә алачак.

Акция ТР Милли музееның 10 филиалында үткәрелә: Габдулла Тукай әдәби музее, А.М.Горький һәм Ф.И.Шаляпин музее, В.И.Ленин музее, Муса Җәлил музей-фатиры, Каюм Насыйри музее, Е.А.Боратынский музее, 1941-1945 елгы Бөек Ватан сугышы музей-мемориалы, Шәриф Камалның мемориаль фатиры белән татар әдәбияты тарихы музее, шулай ук Печищедагы Янка Купала музее һәм Красновидоводагы А.М.Горький музее.

Исегезгә төшерәбез, шулай ук 10 нчы гыйнварда ТР башкаласы халкы һәм кунаклары Казан Кремле музейларына бушлай керә ала. Татар халкы һәм Татарстан дәүләтчелеге тарихы музеенда, ТР Табигать тарихы музеенда, «Манеж» күргәзмәләр залында һәм Ислам мәдәнияте музеенда кунакларны гадәти чират тәртибендә кабул итәчәкләр. «Эрмитаж-Казан» үзәгенә керү һәр ярты сәгать саен, 10:00 сәгатьтән 17:00 сәгатькә кадәр башкарылачак.

Шулай ук укыгыз

Барлык яңалыклар