Апрель аенда казанлылар 9 тоннага якын икенчел чималны эшкәртүгә тапшырган

Әлеге вакыт эчендә «Җыю ноктасы» пунктында 400 ләп кеше булган

Фото: «Торак-коммуналь хуҗалык предприятиесе» ИК

Апрельдә Казанның икенчел чимал кабул итү пунктында 400 гә якын шәһәрле булган. Алар 949 лампа һәм 9 тоннага якын макулатура, пластик, мебель һәм башка калдыклар тапшырган. Бу хакта «Торак-коммуналь хуҗалык предприятиесе» идарәче компаниясендә хәбәр иттеләр.

Тема буенча материаллар:

Ел ахырына кадәр Казанда икенчел чимал җыю өчен 1,2 мең сары сетка урнаштырылачак

«Җыю ноктасы» пункты ноябрьдә ачылды. Әлеге вакыт эчендә 1300 казанлы 4,3 меңнән артык лампа һәм 22 тоннадан артык икенчел чимал, шул исәптән 5 тоннага якын покрышка, 3 тоннадан артык макулатура һәм шул кадәр пыяла, ярты тонна яки 25 мең данә батарея китергән.

«Уртак тырышлык нәтиҗәсендә 25 чүп ташу машинасы белән икенчел чималны, полигонга чыгармыйча, эшкәртүгә җибәрергә мөмкин булды», – диелә идарәче компания хәбәрендә.

«Җыю ноктасы»на килүчеләр саны ай саен арта: гыйнварда 146 кеше 2 тоннадан артык чүп тапшырган; февральдә 200 казанлы 3 тоннадан артык икенчел чимал җыйган; мартта 319 кеше пунктка 5 тонна чамасы каты-көнкүреш калдыгы китергән.

Исегезгә төшерәбез, «Җыю ноктасы» кабул итү пункты Васильченко урамы, 6 адресы буенча урнашкан. Ул көн саен 7:00 дән 19:00 гә кадәр эшли. Пунктта 39 фракция кабул ителә.

Шулай ук укыгыз

Барлык яңалыклар