Казанлылар Бауман урамында узган мастер-класс вакытында «Чабата» татар бию хәрәкәтләрен өйрәнделәр

«Хәрәкәттә – бәрәкәт» проектының чираттагы чарасы шәһәр көне уңаеннан Татарстан башкаласы халкы һәм кунаклары өчен бүләк булды.

Фото: Тел культурасы өлкәсендә милли сәясәтне гамәлгә ашыру бүлеге

(Казан шәһәре KZN.RU, 31 нче август). Кичә Казанның Бауман урамында «Чабата» татар биюе буенча чираттагы мастер-класс узды. Ачык дәрес шәһәр халкы һәм Казан кунаклары өчен Шәһәр көне уңаеннан бүләк булды. Мастер-класста катнашучылар арасында Татарстан, Новгород өлкәсе, Пермь крае һәм Калмыкиядән кешеләр бар иде.

Бию мастер-классын ТР Дәүләт җыр һәм бию ансамбле балеты артистлары Алсу Мәгъсүмҗанова, Владислав Уткин һәм Айнур Фәизов, шулай ук халык биюе буенча педагог-хореограф Сәйдә Минубаева алып барды. Бию көен баянчылар Рөстәм Рафигуллин һәм Газинур Равилов уйнады.

Профессиональ биючеләр артыннан кабатлап, катнашучылар «төп йөреш», «тыпырдау», «бау» хәрәкәтләрен өйрәнделәр. Чара ахырында Казан халкы һәм кунаклары алган күнекмәләрен күрсәттеләр.

«Чабата» – тарихы борынгы заманнардан ук килә торган татар биюе. «Биюнең дәртләндерә торган үз ритмы бар, һәм аның хәрәкәтләре башкаларныкына охшамаган. «Чабата»ны һәркем бии алмый», – диде Алсу Мәгъсүмҗанова.

Исегезгә төшерәбез, «Чабата» татар биюе буенча мастер-класс «Хрәкәткә – бәрәкәт» проекты кысаларында икенче мәртәбә уздырыла. «Чабата» буенча беренче дәрес 2021 елда оештырылды, нәкъ менә шул вакытта аны казанлылар һәм шәһәр кунаклары аеруча яратты, дип хәбәр итә Казан Башкарма комитетының Тел культурасы өлкәсендә милли сәясәтне гамәлгә ашыру бүлеге.

Моннан тыш, 28 нче августта «Черек күл» паркында бию импровизациясе форматында мастер-класс булды. Аны биюче, хореограф, балетмейстер, Муса Җәлил исемендәге «Алтын битлек» премиясе лауреаты Нурбәк Батулла үткәрде. Чара битмейкер һәм диджей Ислам Вәлиев һәм мультиинструменталист Сугдэр Лудупның җанлы музыкасы астында үтте.

Чара башында катнашучылар Нурбәк Батулла белән бергә әкиятләр дөньясына чумдылар. Биюче хәзерге заман аңлатмасында «Өч күгәрчен» татар халык әкиятен укыды, аның тексты тамашачылар алдында аудио-форматка яздырылды һәм музыкага әверелде. Яздырылган тавышлар астында мастер-класста катнашучылар иркен хәрәкәтләнделәр, ял иттеләр, арыганлыкны һәм киеренкелекне бетерделәр.

«Бүгенге көндә кешегә тән иреге җитми, ә импровизация –шул ирек инде ул. Импровизациянең үзенчәлеге – хәрәкәтләрне тән һәм җан теләгәнчә башкару. Моннан тыш, бу биюләр безгә стрессны һәм арыганлыкны җиңәргә булыша. Гади тормышта без һәрвакыт үзебезне ихлас һәм ачык тота алмыйбыз», - дип аңлатты Нурбәк Батулла.

Исегезгә төшерәбез, «Хәрәкәттә – бәрәкәт» проектының җәйге спорт һәм иҗади дәресләре сериясе Казанда 2021 елда старт алды. Узган ел 14 мастер-класс булды. Быел «Ярмәк вагы» татар биюе, чечетка, аэробика, татар халык биюе, җырлы-биюле «Зәлидә» уены, «Батыр батл» һәм балалар өчен зарядка буенча мастер-класслар узды. «Хәрәкәттә – бәрәкәт» чаралары Казан Мэриясе һәм шәһәрнең Парклар һәм скверлар дирекциясе белән берлектә июньнән сентябрьгә кадәр үткәрелә.

Шулай ук укыгыз

Барлык яңалыклар