Казанлылар Татарстанны «Кунакчыллык осталары» бөтенроссия конкурсы финалында тәкъдим итәчәк

Җиңү өчен бөтен илдән 200 катнашучы көрәшәчәк.

Фото: Марат Мугинов

(Казан шәһәре KZN.RU, 7-нче июнь). Түбән Новгородта 8-нче июньнән 10-нчы июньгә кадәр узачак «Кунакчыллык осталары» конкурсының финалында Татарстан данын республиканың алты кешесе яклаячак, шуларның дүртесе – Казаннан. Барлыгы җиңү өчен бөтен илдән 200 катнашучы көрәшәчәк.

«Кунакчыллык осталары» бөтенроссия конкурсы Россиядә туризм һәм кунакчыллык өлкәсен үстерүчеләр өчен үткәрелә. Быел конкурска 30 мең тирәсе гариза кергән. Турыдан-туры сынау этабында иң яхшы нәтиҗәләр күрсәткән һәм үз проектларын тәкъдим иткән 200 кеше генә финалда катнашачак.

Татарстаннан конкурста Казаннан Тимур Гыйльметдинов, Раушания Миңнуллина-Хәбирова, Илья Попов һәм Галина Шәрәфетдинова, шулай ук Алабугадан Виталий Клопот һәм Осиноводан Ләйлә Умарова чыгыш ясаячак.

Конкурста җиңүчеләрнең остазлары кунакчыллык өлкәсендә танылган рестораторлар, отельерлар һәм идарәчеләр булачак. Алар белем бирү сертификатын ота, әйдәп баручы компанияләр һәм оешмаларга стажировка һәм эшкә чакыру, үз проектларын тормышка ашыруга грант ота алачак, дип хәбәр итә «Россия – мөмкинлекләр иле» автоном коммерцияле булмаган оешмасы.

Исегезгә төшерәбез, «Кунакчыллык осталары» бөтенроссия конкурсы – «Россия – мөмкинлекләр иле» президент платформасы проекты һәм «Мәгариф» милли проектының «Һәркем өчен социаль лифтлар» федераль проекты кысаларында гамәлгә ашырыла. Конкурс 2019 елда башланды. Аның максаты – профессионалларның потенциалын ачу, яңа традицияләр формалаштыру, сервис стандартларын арттыру һәм туризм һәм кунакчыллык өлкәләрендә һөнәрләрнең абруен күтәрү. Конкурс барышында катнашучыларның белемнәреннән һәм компетенцияләреннән тыш, кунакчыллык өлкәсендә аларның авторлык проектлары бәяләнә. Аларның иң яхшылары ярдәм ала һәм Россия төбәкләрендә гамәлгә ашырылачак.

Шулай ук укыгыз

Барлык яңалыклар