Казанлылар «Зур этнографик диктант» язачаклар

Халыкара агарту акциясендә катнашучыларга дөнья, ил һәм туган төбәк халыклары турында 60 сорауга җавап бирергә туры киләчәк.

Фото: Денис Гордийко

(Казан шәһәре KZN.RU, 5-нче октябрь). 3-нче ноябрьдән 7-нче ноябрьгә кадәр казанлылар «Зур этнографик диктант» халыкара агарту акциясенә кушыла алачак. Теләгән һәркем үзенең дөнья, Россия һәм үз төбәге халыклары турындагы белемнәрен онлайн-форматта тикшерәчәк. Акция Халыклар бердәмлеге көненә багышланган.

Диктант халыкның этнографик грамоталылыгын, Россиядә яшәүче халыклар турындагы белемнәрен бәяләү генә түгел, ә җәмәгатьчелекнең игътибарын милләтара тынычлык һәм татулык мәсьәләләренә юнәлтәчәк. Анда Россия һәм чит илләрдә яшәүче барлык теләүчеләр катнаша ала. Акциянең телләре – рус, инглиз һәм испан.

Тест биремнәре 3-нче ноябрь көнне 00:01 сәгатьтә «Зур этнографик диктант»ның рәсми сайтында басылачак. Алар өч блоктан тора: гомумфедераль өлешнең 20 соравы , барлык катнашучылар өчен бер үк, төбәк өлешенең 10 соравы, илнең һәр субъекты өчен уникаль, чит ил өлешенең 30 соравы, Россиядән читтәге барлык катнашучылар өчен бер. Барлык биремнәрне үтәгән өчен иң күп балл – 100, үтүгә 45 минут бирелә. Соңыннан һәр катнашучы җавапларны анализлап шәхси нәтиҗә һәм җыелган баллар күрсәтелгән сертификат алачак, дип хәбәр итә Россия Федерациясе Президентының Идел буе федераль округындагы тулы вәкаләтле вәкиле матбугат хезмәте.

«Зур этнографик диктант» 2016 елдан бирле үткәрелә. Аны оештыручылар – Милләтләр эшләре буенча федераль агентлык һәм Удмуртия Республикасының Милли сәясәт министрлыгы.

Шулай ук укыгыз

Барлык яңалыклар