Яшь казанлылар Россиянең иң яхшы йорт идарәчесе исеме өчен көрәшә алачак

Эшләр өч яшь категориясендә кабул ителә

Фото: Денис Гордийко

(Казан шәһәре KZN.RU, 12 нче сентябрь). «Яшь йорт идарәчесе – уңайлы яшәү мохите булдыручы» бөтенроссия балалар һәм яшьләр конкурсында катнашу өчен гаризалар 10 нчы ноябрьгә кадәр кабул ителә. Эшләрне 10-25 яшьлек казанлылар җибәрә ала.

Конкурс балалар һәм яшьләрнең гражданлык активлыгын үстерүгә юнәлдерелгән һәм аларга торак пунктларда уңайлы һәм куркынычсыз яшәү мохитен формалаштыруда катнашу мөмкинлеге бирә.

Эшләр өч яшь категориясендә кабул ителә: «Домовенок»(10 яшьтән 13 яшькә кадәр), «Яшь йорт идарәчесе» (14 яшьтән 17 яшькә кадәр) һәм «Шәһәр хуҗалыгы белән идарә итү өлкәсендә яшь белгеч» (18 яшьтән 25 яшькә кадәр). Катнашучылар фатирларда, подъездларда, ишегалларында, паркларда, скверларда һәм башка урыннарда шартларны яхшырту буенча идеяләр һәм проектлар тәкъдим итә алалар.

Материалларны konkurs@konkurs-upravdom.ru электрон почтасына юлларга кирәк. Читтән торып уза торган этап нәтиҗәләре конкурс сайтында 16 нчы ноябрьгә кадәр урнаштырылачак. Финал этабы декабрьдә Мәскәүдә узачак.

Идеяләр һәм проектлар яңалык, тормышка ашыру дәрәҗәсе, тасвирлау сыйфаты, гамәли әһәмияте һәм башка критерийлар буенча бәяләнәчәк. Җиңүчеләргә дипломнар һәм бүләкләр тапшырылачак.

Шулай ук укыгыз

Барлык яңалыклар