Яңалыклар
21.08.2023, 18:38
Казанлылар татар телендәге язулардагы хаталарны ачыклау конкурсында катнаша ала
Фотоларны «Халык контроле» аша җибәрергә мөмкин
Фото: Марат Мөгыйнов
(Казан шәһәре KZN.RU, 21 нче август). Казанда яшәүчеләрне төрле өслекләрдә – элмә такталарда, мәгълүмат такталарында, топографик билгеләрдә, юл күрсәткечләрендә һәм торак йортлар аншлагында татар телендә язылган язуларда хаталарны ачыклау буенча конкурста катнашырга чакыралар.
Катнашучыларга «Халык контроле» дәүләт мәгълүмат системасы аша фотолар җибәрергә тәкъдим ителә. Моның өчен телефонга мобиль кушымта урнаштырырга кирәк (ул iOS яки Android операцион системасы базасында булырга тиеш), авторизацияләнү һәм «Исемнәрдә һәм язуларда хаталар» категориясен сайлау зарур.
Конкурста катнашу өчен элмә такта тулысы белән күрсәтелгән фотоматериаллар белән (аның нинди оешмага караганы күренергә тиеш) хәбәр җибәрергә кирәк, публикациядә төгәл адресны күрсәтү мәҗбүри, дип хәбәр итте оештыручылар.
Конкурска мөрәҗәгатьне конкурсны оештыручыга – Татарстан Республикасында Кеше хокуклары буенча вәкаләтле вәкилгә язма рәвештә Konkurs.TatOmbudsman@tatar.ru электрон адресына яки ТР, 420015, Казан, Карл Маркс урамы, 61, 3 нче кат адресы буенча, яисә конкурс модераторына – ТР Фәннәр академиясенең Г.Ибраһимов исемендәге тел, әдәбият һәм сәнгать институтына түбәндәге электрон адреска: iyali.anrt@mail.ru яки түбәндәге адрес буенча: 420111, Казан, Карл Маркс ур., 12 җибәрергә мөмкин.
Конкурс җиңүчеләре берничә номинациядә билгеләнәчәк, бүләкләү тантанасы 2023 елның дүртенче кварталында узачак. Алар басма дипломнар һәм акчалата бүләкләр алачаклар.
Шулай ук укыгыз
-
29.04.2025, 17:56 -
29.04.2025, 17:11 -
29.04.2025, 16:43 -
29.04.2025, 16:02
